Tejay van Garderen

Tejay van Garderen
Tejay van Garderen
Ganwyd	12 Awst 1988 ; Tacoma
Dinasyddiaeth	Unol Daleithiau America
Galwedigaeth	cyclo-cross cyclist, seiclwr cystadleuol
Taldra	185 centimetr
Pwysau	68 cilogram
Chwaraeon
Tîm/au	CCC Team, Rabobank Development, Team Columbia-HTC, EF Education-EasyPost
Gwlad chwaraeon	Unol Daleithiau America

Seiclwr proffesiynol o'r Unol Daleithiau ydy Tejay van Garderen (ganed 12 Awst 1988), sy'n arbennigo mewn rasio ffordd.^[1]

Bywgraffiad

Blynyddoedd cynnar

Ganed van Garderen yn Tacoma, Washington, yr UDA, ond treuliodd y rhan fwyaf o'i bblentyndon yn Bozeman, Montana. Daw o ddisgyniad Iseldiraidd a siaradai Iseldireg yn weddol dda, wedi iddo dreulio ei ddwy flwyddyn gyntaf proffesiynol gyda'r tîm Iseldiraidd, Rabobank. Dechreuodd seiclo pan oedd yn 10 oed. Pan oedd yn 14, bu bron iddo guro'r marc dwy awr ar esgyniad Mount Evans, allt 28 milltir sy'n codi 7,000 troedfedd.^[2] Enillodd 10 teitl cenedlaethol iau ar y ffordd (ras ffordd, ras gylchffordd a treial amser) a cyclo-cross.^[3] Yn ei arddegau, reidiodd dros dimau datblygu Team Rio Grande Racing (2004–2005; Fort Collins, Colorado)^[4] a Team 5280 Magazine (2005–2006, rhan o Garmin-Sharp erbyn hyn; Boulder, Colorado).^[5]

Gyrfa

Odan 23 (2007–2009)

Un o rasys pwysig cyntaf van Garderen wedi iddo droi'n 18, oedd yr Amgen Tour of California yn 2007, lle gystadlodd fel aelod o'r tîm cenedlaethol. Tynnodd allan o'r ras yn ystod cymal 4.^[6] Bu'n cystadlu yn yr Unol Daleithiau ac Ewrop yn 2007, gan ddod yn 20fed yn y Tour de l'Avenir

Ymunodd van Garderen â tîm Rabobank Continental yn 2008, a symudodd i fyw i'r Iseldiroedd. Cystadlodd yn y Flèche du Sud a Circuito Montañes. Enillodd gymal o'r Tour de l'Avenir a gorffennodd yn 24ydd ym Mhencampwriaethau Ras Ffordd y Byd odan 23 yn Varese, yr Eidal.

HTC-Columbia (2010–2011)

Symudodd van Garderen i Team HTC-Columbia y flwyddyn canlynol.^[7] Daeth yn 9fed yn ei ras gymalog cyntaf, y Volta ao Algarve, a daeth yn 5ed ar y cymal a orffennodd ar gopa Alto do Malhao. Yn Tour Twrci 2010, daeth yn ail mewn dau gymal yn ogystal ag ail yn y dosbarthiad cyffredinol, 29 eiliad tu ôl i Giovanni Visconti.

Cefnogodd van Garderen arweinydd y tîm Michael Rogers yn ystol cymalau 6 ac 8 Tour of California 2010. Gorffennod yn 28fed wedi helpu Rogers ennill.

Dechreuodd van Garderen Critérium du Dauphiné 2010 fel cyd-arweinydd HTC-Columbia gyda Kanstantsin Siutou a Peter Velits. Wedi bron a curo Alberto Contador yn y prologue, daeth yn 4ydd yn nhreial amser cymal 3 gan symyd fyny i'r ail safle yn y dosbarthiad cyffredinol. Fe gollodd amser yn y mynyddoedd gan orffen yn y 3ydd safle.

Reidiodd van Garderen yn gryf yn ystod pythefnos cyntaf Vuelta a España, a bu'n domestique gwerthfawr i Peter Velits a orffennodd yn drydydd.

Yn 2011, daeth van Garderen yn ail ar gymal 3 y Volta ao Algarve^[8] ac ail safle yn prologue Tour of Switzerland (tu ôl i Fabian Cancellara).^[9] Enillodd grys reidiwr ifanc gorau'r Tour of California wedi perfformiad cryf a chyson.

Dewiswyd ef fel aelod o'r tîm ar gyfer Tour de France 2011. Hon oedd Tour de France cyntaf van Garderen, ac roedd yn reidio i gefnogi Tony Martin a Peter Velits.^[10] Yn yr wythfed cymal, cipiodd van Garderen ddigon o bwyntiau ar esgyniad Categori 2 er mwyn ennill y brig yn nosbarthiad Brenin y Mynyddoedd, a chael ei enwebu'n reidiwr mwyaf brwydrol y cyml hwnnw. Ef oedd yr Americanwr cyntaf erioed i wisgo'r crys dot polca ar gyfer Brenin y Mynyddoedd yn y Tour de France (arweiniodd Greg LeMond y dosbarthiad am gyfnod byr yn ystod Tour de France 1986, ond gan y bu'n gwisgo'r crys melyn ar y pryd, ni wisgodd y crys dot polca). Yn ystod cymal 8 hefyd, y cyfeirwyd ato fel y "Bozeman Boss" gan y sylwebydd Phil Liggett.^[11] Yn y Tour of Utah, enillodd van Garderen dreial amser y trydydd cymal.^[12]

BMC Racing Team (2012–)

Wedi i HTC-Highroad ddod i ben, ymunodd van Garderen â BMC Racing Team ynghyd â'i gyd-aelod tîm o HTC, Marco Pinotti.^[1] Enillodd van Garderen crys y reidiwr ifanc gorau yn ras Paris–Nice yn gynnar ym mis Mawrth,^[13] wedi iddo wisgo'r crys drwy gydol y ras.

Dewiswyd van Garderen i gystadlu yn y Tour de France fel un o'r prif domestiques ar gyfer enillydd y flwyddyn gynt, Cadel Evans. Perfformiodd yn gryf yn ystod yr wythnos gyntaf, gan ddod yn bedwerydd yn y prologue a gwisgo'r crys gwyn - ar gyfer y rediwr ifanc gorau odan 25 yn y dosbarthiad cyffredinol - tan cymal 7, pan gollodd llawer o amser wrth i'r cymal orffen ar gopa. Ail-gipiodd y crys pan orffennodd yn bedwerydd ar gymal 9, treial amser unigol. Ar gymal 11, ceisiodd van Garderen helpu Evans i ymosod oddiar flaen y peleton, ond roedd yn gryfach nag ef, a bu iddo arwain ei arweinydd i'r copa yn hytrach.