anaoudegezh

Brezhoneg

Etimologiezh

Diwar an anv-gwan anaoudek hag al lostger -ezh.

Anv-kadarn

anaoudegezh /ãnɔwˈdeːɡɛs/ benel (liester : anaoudegezhioù)

1. Traoù anavezet, deskadurezh.

   Kaout anaoudegezh en un dra bennak : e anavezout.

   • N'edont ket hep gouzout, emezo, e oan barrek da seveniñ o c'hoant dre an anaoudegezh am boa eus an doare ma veze graet marc'had gant ar re zu. — (Daniel Defoe, lakaet e brezhoneg gant Yeun ar Gow, Abrobin, Al Liamm, 1964, p. 14.)
   • Ha neuze me am eus anaoudegezh a-walc'h e-barzh ar c'hoajoù-se. — (Jules Gros, Le trésor du breton parlé Deuxième Partie, 1970, p. 19.)
   • N'em eus tamm anaoudegezh ebet ennañ. — (Jules Gros, Le trésor du breton parlé Deuxième Partie, 1970, p. 19.)

   Reiñ anaoudegezh en un dra bennak, eus un dra bennak : reiñ da c'houzout.

   Tud a anaoudegezh : tud ouiziek

   • Tud « gouiziek » a vez lavaret pa vez tud a anaoudegezh. — (Jules Gros, Le trésor du breton parlé Deuxième Partie, 1970, p. 19.)

2. Skiant-vat

   Bezañ e anaoudegezh gant unan bennak : bezañ gouest da anavezout an dud hag an traoù, bezañ yac'h a spered.

   • Hag hec'h anaoudegezh ganti! TBP

3. Ober anaoudegezh gant [unan/un dra] bennak
   • − « [...]. Ha dont a rez ganin d'ober anaoudegez gant hor rannad foziou-difenn ? » — (Abeozen, Dremm an Ankou, Skridoù Breizh, 1942, p. 11.)
   • Galvet e voen d'e vete an deiz kentañ, rak gwech ebet ne dremene hep ober anaoudegezh gant kement paotr yaouank nevez zegouezhet dindan e bav. — (Jarl Priel, Va Zammig Buhez, Al Liamm, 1954, p. 84.)
   • Ennañ em eus bet treuzet, meur a wech, ha graet anaoudegezh gant ar vro dudius-se, [...]. — (Yeun ar Gow, E Skeud Tour Bras Sant Jermen, eil emb. Al Liamm, 1978, p. 12.)
   • Er mare-se e tegouezhas din ober anaoudegez gant un Tregeriad all, ar sonaozour Paol ar Flemm, [...]. — (Jarl Priel, Amañ hag Ahont, Al Liamm, 1957, p. 25.)
   • Graet en deus anaoudegezh gant e nerzh. — (Jakez Riou, Geotenn ar Werc'hez ha danevelloù all, Al Liamm, 1957, p. 39.)
   • Graet em boa anaoudegezh gant kalz planterien, deuet da c'houde, da vezañ mignoned vat din, [...]. — (Daniel Defoe, lakaet e brezhoneg gant Yeun ar Gow, Abrobin, Al Liamm, 1964, p. 14.)
   • Tri bloaz 'zo en deus graet anaoudegezh gant Mona Wegen, tregont vloaz d'ar poent-se, [...]. — (Pêr Denez, Glas evel daoulagad c'hlas na oant ket ma re, Al Liamm, 1979, p. 13.)
   • Buan e teuas Nikolaz Briant da ober anaoudegezh gant e amezeien nevez. — (Jakez Konan, Lannevern e kañv ha danevelloù all, Al Liamm, 1980, p. 16.)
   • Un digarez 'vo din d'ober anaoudegezh gantañ. — (Goulc'han Kervella, Brezel ar Rigadell, Al Liamm, 1994, p. 99.)
   • Graet en doa anaoudegezh ganti en ur bal a c'hiz kozh e Prad. — (Fañch Peru, Kañfarded Milin ar Wern, Skol Vreizh, 2008, p. 11.)
4. anaoudegezh-prenet : skiant-prenet
5. Anaoudegezh-vat

   kaout anaoudegezh-vat

Gerioù kevrennek

• dianaoudegezh
• dizanaoudegezh

Troioù-lavar

• koll anaoudegezh, koll e anaoudegezh

Troidigezhioù

• galleg : connaissance ^(fr)
• galleg : gratitude ^(fr) , reconnaissance ^(fr)