Dael Breizh

Dael Breizh zo anv ur vodadenn a barlamantourien vreizhat bet dilennet gant voterien dieub, bet krouet e 2012, dezhi da bal sevel ur vonreizh vreton evit ur Vreizh emren pe emrenoc'h, hep tremen dre an dilennadegoù gall ofisiel. Difenn menoz an demokratelezh ha gwirioù ar pobloù distad eo e bennsturioù.

Istor

Roet ez eus bet lañs da Zael Breizh dre grouidigezh ar gevredigezh Kelc'h An Dael, ur gevredigezh disklêriet hervez lezenn c'hall 1901, e-pad ha da-heul emsav poblek ar Bonedoù Ruz e Breizh. Kelc'h An Dael, embreget gant un nebeud emsaverien anavezet evel Yann-Vleiz ar C'huñv, a felle dezhañ bodañ nerzhioù lies hag enebet an emsav evit lakaat anezho d'en em glevout war un nebeud krefen bennañ diwar-benn kudennoù Breizh, en ur dennañ splet eus manifestadegoù ar Bonedoù Ruz ha kounnar ar Vretoned a-enep d'an telloù lakaet war an treuzdoug. Chomet boud eo bet an embregadenn-se dre ma nac'has hiniennoù zo kenlabourat gant re all eus an tuoù politikel enebet. Nebeut war-lerc'h avat e voe savet Dael Breizh hag ar menoz dihuniñ ar parlamant breizhat evit adkrouiñ gwirioù lezennel da Vreizh.

Dilennadegoù ha mont en-dro

Kelc'hiad kentañ : 2016-2019

An dilennadegoù broadel breizhat kentañ a zo bet aozet er bloaz 2016 goude ur bloavezh kabaliñ ha bruderezh dre Vreizh a-bezh bet renet gant ar gevredigezh Kelc'h An Dael, e-karg eus sternidigezh ha melestradur an Dael. Evit bezañ voter eo dav bezañ Breizhat, hervez divizoù bet dibabet gant Kelc'h An Dael, ha leuniañ un teuliad a ranker kas da Gelc'h An Dael. Resevout a reer ur gartenn-votiñ a c'hallo bezañ implijet da viken. Divizoù a zo ivez evit en em ginnig evel danvez-parlamantour.

33 parlamantour a zo bet dilennet e miz Kerzu 2016 gant ur pemp kant voter bennak. Kendalc'hoù a zo bet ingal, reoliek, bep miz e-kerzh ar c'helc'hiad kentañ en deus padet tri bloaz evel bet divizet gant Kelc'h An Dael. Al lec'h evit bodañ an Dael a c'hall cheñch dre ma n'en deus ket a benn-karter nag a savadur privez. Ar c'helc'hiad kentañ-se en deus kejet gant un nebeud diaesterioù abalamour ma ne oa ket tud-a-vicher eus ar barlamantourien bet dilennet, nag evit-se en deus gouezet chom war-sav ha padout.

Eil Kelc'hiad : 2019-2022

E miz Kerzu 2019 e voe aozet an eil dilennadegoù broadel breizhat. Nebeutoc'h a zanvez-parlamantourien zo bet war ar renk, ha daouzek parlamantour hepken e-lec'h an 33 gortozet zo bet dilennet. Kendalc'h kentañ an eil kelc'hiad zo c'hoarvezet evelato d'an 18 a viz Genver 2020 e Surzhur, e bro Wened. Roll-labour ar barlamantourien a zo kenderc'hel da sevel bonreizh Vreizh dazont en ur glask dont a-benn d'en em vrudañ muioc'h e-touez ar Vretoned, en ur dizhout voterien nevez, evit gallout diazezañ kreñvoc'h he reizhwiriegezh evel bodadenn demokratel poblek.

Liammoù

(fr) Lec'hienn internet Dael Breizh
(fr) Lec'hienn internet Kelc'h An Dael
Evit gouzout hiroc'h, lenn Ar Gouloù Gwenn niverenn 11, Kelc'h An Dael, un araokadenn nevez evit ar vro, Here 2020.