Bosenn Zu

Interamant ar re varv gant ar Vosenn Zu e Tournai.
Skeudenn tennet eus "Kronikoù Gilles Li Muisis" (1272-1352). Bibliothèque royale de Belgique, MS 13076-77, f. 24v..

Ar Vosenn Zu pe ar Vosenn Vras eo ar poread bosenn en em ledas e kornôg Azia hag en Europa er XIV^vet kantved. Soñjal a reer e varvas 75 milion a dud, d’an nebeutañ, diwar ar c’hleñved-se. Un efed bras he devoe ar Vosenn Zu en Europa : un drederenn eus poblañs ar c’hevandir a varvas, digreskiñ a reas galloud an Iliz katolik ha taget e voe ar Yuzevien, a selled outo evel ar re o doa degaset ar c’hleñved da Europa.

Dont a ra an anv eus an takadoù du a deu war wel war gorf (kazel ha pleg ar vorzhed dreist-holl) ar glañvourien skoet gant ar c'hleñved. Hiziv an deiz e ouzer mat ez eo pennkaoz Yersinia pestis, ur spesad bakteri bet kavet gant ar bakteriologour Alexandre Yersin (1863-1943) e 1894.