ဖြေ့ဗုက် (အိန်းကလေတ်: Facebook) (ဟဲ့ꩻ) ဖြေ့သဗိုက် နဝ်ꩻ ထွာဒျာႏ လိုꩻမုꩻသွုပ်သမ်ႏရေꩻမီဒီယာ တောမ်ႏ လိုꩻမုꩻသွုပ်သမ်ႏရေꩻ ကွန်ယဲတ်ဝန်ဆောင်မု တဲင် အမေႏရိကန်ႏခမ်း အနယ်ꩻပညာႏထာꩻမာꩻတန်စွိုꩻ မေတာကုမ္ပဏီႏ ကပဲင်ႏဆဲင်ႏဒါႏ ထာꩻမာꩻတန်လဲင်းလောင်း တဗာႏဒျာႏသွူ။ ဖြေ့ဗုက်ယိုနဝ်ꩻ မက် သကာဗက် တောမ်ႏ ဟားဗတ်ကေားလေက် ကျောင်ꩻသား သွꩻပေႏလစ်ꩻဖြာꩻ ကထွာဒါႏ Eduardo Saverin, Andrew McCollum, Dustin Moskovitz, Chris Hughes သီး သွꩻပေႏစွိုꩻ ဖန်ဆင်ꩻမာꩻခါꩻဒျာႏ ခရိစ်နေင်ႏ ၂၀၀၄ ဗာႏကိုသွူ။ နဝ်ꩻမꩻ "ဖြေ့ဗုက်" ကရိုꩻဒါႏ အမိဉ်ꩻယိုတဲ့ ထွာဒျာႏ အမေႏရိကန်ႏခမ်းကို ကအဝ်ႏဖန်ဟဲ့ꩻခွိုꩻဒါႏ တက္ကသိုလ်ႏကျောင်ꩻသားဖုံႏတာႏ "face book" ငဝ်းငွါကို လင်ꩻလွဉ်နဝ်ꩻသွူ။ ကဗွောင်စဖြေ့ဗုက်ခိန်ႏနဝ်ꩻ ရဲးခါꩻနေးထူႏသုင်ꩻခွင်ꩻတဲင် သုင်ꩻလꩻကွို့ꩻ အမေႏရိကန်ႏတက္ကသိုလ်ႏဖုံႏကိုလွုမ်ꩻသွူ။ တယ်ႏ ၂၀၀၆ ဗာႏခိန်ႏ လွိုတဲင် ကရဲးပေ့ꩻခါꩻဒါႏ သက်(၁၄)မာꩻလသား သုင်ꩻလꩻတဝ်း ခမ်းထီဖုံႏ၊ ဖြေ့ဗုက်နဝ်ꩻ တယ်ႏသက်(၁၃)မာꩻကီသား လိုꩻတွိုင်ꩻထူႏသုင်ꩻခွင်ꩻ လꩻလွေꩻနဝ်ꩻသွူ။[၁] ၂၀၂၄ ဗာႏ နိုဝဲမ်ဗာလာအလꩻ ဖြေ့ဗုက်နဝ်ꩻ နွို့လꩻထွာလွေꩻ ကမ္ဘာႏလောင်း လိုꩻနွို့ထွားထူႏသုင်ꩻသား အအာသွတ်ꩻဝဲက်သုဲက်အကို အဝ်ႏအရန်း(၃)တဲင် နဝ်ꩻအကို သုင်ꩻအာသား(၂၃%)နဝ်ꩻ ထွာအဝ်ႏဒျာႏ အမေႏရိကန်ႏခမ်းလွဉ်နဝ်ꩻသွူ။[၂] နဝ်ꩻမꩻ ဖြေ့ဗုက်ယို ၂၀၁၀ ရပ်အကို ထွာလွေꩻ လိုꩻဒေါင်းထူႏအအာသွတ်ꩻ ဖိုန်းသော့ဝွဲး တဗာႏနဝ်ꩻသွူ။ ရွုမ်ꩻချုတ်နဝ်ꩻ အဝ်ႏဒျာႏ ဝေင်ꩻမဲဉ်လိုပက်(Menlo Park) ကယ်လီဖိုးနီးယားခမ်းနယ်ႏ အမေႏရိကန်ႏခမ်း အခဝ်တွို့ꩻကိုနဝ်ꩻသွူ။
