Tenrikyo
Tenrikyo adalah agama nang didiriakan ulih saurang binian Japang nang bangaran Miki Nakayama (nang labih dipinandui ulih pangikutnya sabagai Oyasama) pas abad 19. Agama ngini pamulaannya dianggap sabagai sabuting sekte atawa bagian matan agama tradisiunal Shinto Japang tapi wayah ini Tenrikyo sudah bujur-bujur tapisah lawan urganisasi agama Shinto wan Buddha gara-gara baisi kaunikan wan sistim kaparcayaan nang balain matan kadua agama ngitu tadi jadinya diklasifikasiakan sabagai shinshūkyō (garakan kaagamaan hanyar), gara-gara hanyar didiriakan pas abad ka-19.[1]
Sajarah
[babak | babak asal-mulanya]Pas 12 Desember 1838, Miki Nakayama mangaku mandapatkan pasan matan Tuhan (Tenri-O-no-Mikoto) di Kuil Mishima wan Tuhan maangkat inya sabagai "Kuil Tuhan". Tahun 1854, Miki Nakayama mulai bacacari buhan pangikut pamulaannya. Imbah ngitu pas tahun 1866 di Ofudesaki, kitab suci ajaran Tenrikyo diulah. Misi Tenrikyo adalah gasan malajari wan maanjurakan "Hidup Suka Cita" (yōki yusan atawa yōki gurashi), nang kawa dicapai malalui manggawi amal wan kasadaran pikiran (hinokishin).[1]
Parinsip Kaagamaan
[babak | babak asal-mulanya]Buhan panganut Tenrikyo parcaya lawan sabuting Tuhan nang tunggal, yaitu Tenri-O-no-Mikoto, nang diartiakan sabagai pancipta wan urang tuha ruhani nang paduli lawan sabarataan umat manusia. Tenrikyo malajari bahwa alam samasta adalah awak Tuhan. Tujuan sapiritual Tenrikyo sabagai agama adalah lawan pambangunan Kanrodai atawa pilar ilahi wan gasan mangganii manyalamatakan sabarataan umat manusia. Tenrikyo parcaya jua lawan Rainkarnasi (denoshi). Tenrikyo malajari jua lawan kashimono-karimono atawa "hal nang dipinjamakan" nang baarti awak manusia. Sifat nafsu awak manusia kada dianggap sabagai dusa malainakan sabagai "dabu", nang harus disapu jauh matan pikiran malalui kasadaran hinokishin wan ritual kaagamaan. Lawan cara kaya itu manusia hanyar kawa mandapatakan kadamaian wan kabahagiaan nang sabujurnya.[1]
Hidup suka cita dalam Tenrikyo diartiakan sabagai batin nang bibas matan kakuluhan, iguisme, kamuaran, kasarikan wan kasumbungan. Ada 8 dabu mintal manurut Tenrikyo, yaitu: engken (Oshii), katimburuan (Hoshii), kamuaran (Nikui), iguis wan mamantingakan diri surang (Kawai), pahirian wan dandam (Urami), muar (Haradachi), kakuluhan (Yoku), wan arugansi (Kouman). Kadalapan dabu mental ngini harus dibarsihakan lawan mamakai mitudi Hinokishin (Kasadaran).[1]
Pusat Kaagamaan
[babak | babak asal-mulanya]Tenrikyo baisi pusat di Kota Tenri, Nara lawan bamacam fasilitas nang tadiri matan Universitas, Rumah Sakit, Sakulah Agama, Gadung Batamuan, Shuyoka (pendidikan singkat), asrama, wan Sakulah Manangah Atas, wan bamacam-macam urganisasi lainnya nang bafukus pada kumunitas wan palayanan.[1]
Tenrikyo di Nagara lain
[babak | babak asal-mulanya]
Agama ngini baisi 16.833 tampat sambahyang lukal lawan 1,75 juta pangikut di Japang wan labih matan 2 juta ikung urang pangikut di samunyaan dunia. Salain di Japang, Tenrikyo kawa jua ditamui di Argentina (Buenos Aires), Australia (Brisbane, Melbourne), Barasil (Bauru), Kanada (Vancouver), Hong Kong, Kulumbia (Cali, Bogota, Medellìn), Parancis (Paris), Miksiko (Mexico City), Taiwan (Taipei), Thailand (Bangkok), Inggeris (Leeds, London), Amirika Sarikat (Hawaii, Los Angeles, New York), Pilipina (Makati, Manila, Laguna).[1]