Гіхон

Крыніца Гіхон у Іерусаліме, сучасны выгляд

Гіхон, або Геон (іўр.: גיחון) — біблейская рака, што выцякае з рая. Мяркуецца, што назва паходзіць ад дзеяслова іўр.: גיח «вырывацца наперад». Звычайна гэты дзеяслоў дапасуецца да рэк, што вырываюцца з зямлі, або да дзіцяці падчас працэсу нараджэння.

У кнізе Быцця паведамляецца, што гэта адна з 4 рэк, якія бяруць пачатак у раі, яна абцякае краіну Куш. Тэолагі і гісторыкі імкнуліся атаясняць Гіхон з Нілам, Блакітным Нілам, пратокай ракі Еўфрат і іншымі рэкамі, што існуюць або існавалі на самой справе. Аднак пытанне аб магчымай лакалізацыі ракі Гіхон і краіны Куш застаецца спрэчным.

Назвы Гіхон і Геон пазней выкарыстоўваліся ў тапаніміцы і найменні архітэктурных пабудоў. Так, у Кедронскай даліне існавала крыніца Гіхон, у якой Марыя паласкала пялёнкі маленькага Ісуса.