Альфёльд

Краявід Хортабадзьскай пусты ў Венгрыі.

А́льфёльд (венг.: Alföld (Nagyalföld) — нізіна, харв.: Panonska nizina, рум.: Câmpia Tisei, славацк.: Veľká dunajská kotlina, сербск.: Панонски басен) — самая вялікая частка Сярэднедунайскай раўніны паміж Дунаем на захадзе і Карпатамі на ўсходзе, галоўным чынам у Венгрыі (з каля 100 000 км² агульнай плошчы Венгрыі Альфёльд займае 52 000 км²), а таксама ва ўсходняй Славакіі (Усходнеславацкая нізіна ў Кошыцкім краі), паўднёва-заходняй Украіне (Закарпацкая нізіна), заходняй Румыніі, паўночнай Сербіі і ўсходняй Харватыі.

Плоская раўніна, большая частка пакрыта лёсамі і лёсападобнымі суглінкамі, з урадлівымі чарназёмнымі глебамі, разаранымі пад збожжавыя культуры. На водападзеле Дуная і Цісы знаходзяцца вялікія плошчы сыпучых пяскоў з характэрнымі дзюннымі ўтварэннямі, выцягнутымі ў паўночна-заходнім напрамку ў адпаведнасці з пануючымі вятрамі. Па цэнтральнай частцы працякаюць рэкі Ціса і яе прыток Кёрэш, тут знаходзяцца буйныя гарады: у Венгрыі Сегед, Кечкемет і Дэбрэцэн, а ў Харватыі Осіек, Славанскі-Брод і Вукавар. На бяссцёкавых тэрыторыях — дробныя салё­ныя (со­давыя), перыядычна пе­расы­хаю­чыя азёры, якія выкарыстоўваюцца ў ле­кавых мэтах.

Развіваецца са­доўніцтва, гародніцтва (тама­ты, пе­рац па­прыка і інш.), жывёлагадоўля. Альфёльд — адна з трох буйных вінаробных зон Венгрыі, якая падзяляецца на драбнейшыя рэгіёны (у тым ліку Куншаг, Чонград).