Xavər Vəkilova

Xavər Vəkilova
Xavər Vəkilova
	Xavər Əhməd qızı (Mirzəbəyova) Vəkilova
Doğum tarixi	13 mart 1918
Doğum yeri	Dərbənd
Vəfat tarixi	6 yanvar 2006 (87 yaşında)
Vəfat yeri	Bakı
Həyat yoldaşı	Səməd Vurğun
Uşaqları	Aybəniz Vəkilova,; Vaqif Səmədoğlu;
Mükafatları	Azərbaycan Respublikası Prezidentinin fərdi təqaüdü

Xavər Əhməd qızı Vəkilova — Azərbaycan Respublikası Prezidentinin fərdi təqaüdçüsü, əməkdar mədəniyyət işçisi.

Həyatı

Xavər Əhməd qızı (Mirzəbəyova) Vəkilova 1918-ci il martın 13-də Dərbənd şəhərində məşhur şəxsiyyətlərdən sayılan Nağıbəy Mirzəbəyli nəslinə məxsus zadəgan ailəsində anadan olub. Xavər xanım Əhmədbəy Mirzəbəyovun ailəsində dünyaya gələn on birinci uşaq olub. Xavər xanımın bacısı Şahzadə xanım tanınmış yazıçı, Səməd Vurğunun xətrini çox istədiyi, ehtiramla yanaşdığı Abdulla Şaiqin həyat yoldaşı olmuşdur. Abdulla Şaiq Xavər xanım hələ 13 yaşı olanda ona “Sevimli baldızım Xavərə!” adlı şeir həsr etmişdi.

Xavər xanım Azərbaycan Dövlət Konservatoriyası nəzdindəki 10 illik musiqi məktəbində təhsil almışdır. 1941-1946-cı illərdə Azərbaycan Dövlət Universitetinin filologiya fakültəsində (indiki BDU) təhsi almış, filoloq ixtisasına yiyələnmişdir. 1934-cü ildə Azərbaycanın xalq şairi Səməd Vurğunla ailə həyatı qurub. Bu izdivacdan onların üç övladı – Yusif, Aybəniz, Vaqif dünyaya gəlmişdir.

1975-ci ilin oktyabr ayında açılan Səməd Vurğunun ev-muzeyi yaranan gündən ömrünün sonunadək muzeyin direktoru vəzifəsində çalışmışdır. Onun hələ Səməd Vurğunun sağlığında qoruyub saxladığı materiallar əsasında muzeyin ekspozisiyası xeyli zənginləşmişdir. Xavər xanım bu muzeyi — Səməd Vurğun həyatını insanlara əyani şəkildə çatdıran müqəddəs bir ocaq kimi qoruyub saxlayırdı. İşlədiyi müddətdə Mədəniyyət Nazirliyi tərəfindən müxtəlif fəxri fərmanlara layiq görülmüşdür. Xavər Vəkilovanın muzey fəaliyyəti Heydər Əliyev tərəfindən yüksək qiymətləndirilmişdir. Belə ki, o, 2002-ci ildə “Əməkdar mədəniyyət işçisi” adına layiq görülmüş, 2003-cü ildən isə ona “Prezident təqaüdü” verilmişdir.

Xavər Vəkilova 2006-cı ilin yanvar ayının 6-da vəfat etmişdir.