Danebury (ralma)

Ralma ke Danebury tir tan jontik folkayenaf debak ( englavon hill fort ) kolnayan vagee Engla wali 1000 AGJ is 500 AGJ. Batlana ralma exonoyena moe denoxa tiyid dodafa widega ke bane sare ; va dolexo is katanaxo katecton gu alkafa jora is gelbe todon gu wupe zanudayad. Keltafa ralma Kelor is migexa ke Danebury Hill fort ralma wale ontinafo tawapiexo is titsuyaf kelor remo tuvel koe rojusa migexa anton zo rovansayad. Koe anambe, rea solparseyena gu joya va yon tum dem ivamufa mona is emacek dem olkxe is onya is zaipak suxayan koe sid kabelcayar. Ralma tiyir av ke lizukafa blira : vemafa tawamidusa doda va warolaks abdaraykayar ; dere tiyir tegiraf av ke yon yambudik isu dolekik isen alkafa jora koeon zo grustayad. Va gelbe bak skaltafa rekola dere yordayar, bravason va sanelia do bonoleem is kiewegeem is keson va tena ke wupe. Yona decemoya hill fort ralma koe Britana pakon zo joxayad. Rawopaf orig kayestayan noved da va vieleafa blira koe britanaf ewaleem bak Azilugal abdi romafa tolgenira lokiewon grupet. Bak idulugal ke 1969, Barry Cunliffe britanaf rawopik va bralasa brimga koe Danebury debak tigis koe Hampshire gola vagee Engla suxar. Kaliapon sonker da tum dem jondecemdaf aal tice bria va abdiizvugalafa ralma savsafa gu 2500 tanda kidar. Aal comayan gan nyul zo balied. Bam rawopik romaltegid ise va debak kojoxad abdida seg di zo ikataplekur. Joxara tolsandon jijad. Danebury va intyona birga adre mobilder, darpe kot idulugal, isen rawopik va loon lik ke welma vas aluboy divatces decemiray ke ralma lajuvestad. Folkayeem Enintedaxo ke ralma Folkayera va Danebury bria moni -600 tozuweyer, ton vegedura va intanuku ontinafu gu mon 4 m- ruldasu vas pakap ke briotsa. Nuku gu tawapiexo zo tuprantayar isen vabdueon suxayan kelor va rojus bolk tuzegodayar. Mulafa artazukara moni -400 dilizeyer : intanuku gu granafa migexa arte vekoraf kelor zo ikaplekuyur. Soluma wale otva ke ve is ontinuk ke migexa tiyir vas mon 16 m- numen kota urpera zo tuwavdayar moekote tode ruzadesik gu tcanda dem mimadjo miledje zo aorayad. Kolanixo tiyid lorantafa uta ke folkaykirafa widava. Koe Danebury, dalafo kolanixo ( ronef tuvel ) tiyir kaike birtafa truminda dem migexa is kelor oblatason va vansara ke kasaf ruzadesik. Kore volnik va divef tuvel co lajuremigayar pune koe berla dem vokefa fruktifa migexa co di zo licayar lizu rojusik va ruzadesik gu raporki ticuon aorayad. Koe savsafa ralma ke Danebury Ralma remi 150 tanda gan tawamidusa doda ke bemafa azeka zo faveyer. Lo irubasik va tcastaf diel koe azeka aname bria kereleyed. Irubasikafa ota ke folkaykirafa wida arse meviele tiyir vas lo 200 korik. Kolna ke wida tiyid ke toloy ord : mona is olkxe. Ivamufa mona dem xakola vas mon 6 m- kake migexa bravon gu suka tigiyid. Teyxo is cade is kela ta abdaraykara va sinka is aryona xa koeon zo senuyud. Rontagentimafe olkxe giskinafe gu granaf intagerot va ontinafa abdaraykara noveyed. Batkane sinka tiyir bravon gu sebadadunol is lo dasaf sulem. Tawamidura tiyir nelkafa tegira ke vemaf irubasikeem. Tawadayik va namulol is jaftol is bulol varteyed ; va dent is olyub koe taya aname bria miduyud. Conyuta ke kelda malsaveyena gan bonoleem bazed da ban sin kal folkaykirafa wida zo stayad lize di zo balieyed ( konak celemoy xim isu niska koe anambe zo katrasiyid ). Blotafa vertuma tiyir omavon gu zaipaf warzeks isu sulemaf. Bonol va atela is vroda warzeks ( vrod is bluda ) tiskayad ; zaipa ton regelta ta beg is kurfa zo glefayad. Ilt is kuldenga is voja is ruxa is wikande is dieke dere tiyid ke rude ke azilugalafa sanelia. Malsavera va bireip koe Danebury gan kosmara va stogoyeks ke tawoldafa sarma suyusa va conyuta ke eip zo gruyer. Eip, i benelafa tadlexa ke blotara, ta videra va atela dere zo faveyer. Femura is layera tiyid pak ke gubef tegireem ke kwafa blira koe Danebury. Vafa namulolafa bayna kan loitesiki kum barmada ik niskada taneon zo loiteyer aze kan nuba is jepkeda dem raporafo ok kuritcafo kevaldo zo femuyur. Azon bayna keve xufa rujda zo layeyer. Lay kan ruxafa biaxa ape zo biayad. Azilnyofasik va azilafa ik iyekotafa xeka isu ingaxa iayad. Fwek malu geefa krimta kal Danebury zo vanlizukeyer aze ta epura va mak di malsaveyer. Kotcoba obar da irubasikeem ke Danebury va migura is diolura lomegayad. Va okolafa oria oku jaftolafa trumon daykayana moe ludev koe kela zo katrasiyid. Ara kela vas empa ke trocadayaf trig dovoron nuvarbeyen ruldayad. Irubasik va sinka pu lorik ika warolaksany rotir firviyid. Ironokaf viel ke Danebury Lentaf wiks male Danebury ralma Doda ke Danebury va abica betara remi 300 tanda grupeyer. Blira dum kotedje wanuyur, kare kruldesaf armor ke cadimeem is midusa doca. Migexa zo kiewagiyid, kelor zo tucuayad, savsafa kolna gan warzaf vegeduks zo ikaplekuyud. Batinde tandatandon is decemdadecemdon kali riwe -100, ugale ralma zo jovler. Intaf tuvel zo anteyar, rojus kelor kum dibla kildesa ticu tawafi mandi toz adonewed. Nope megrupena lazava, doda va forteykirafa wida bulur numen tuwava va rokeem di ilzilir. Bula ke keleem Lo 1000 kela, fuxe ota uldinena vas 5000, koe Danebury zo joxayad. Ton gedraf tazuk, koe afoltaf titek cugon titsuyon ic toloye metre zo suxayad. Ta abdaraykara va denta is olyuba nelkon zanudayad nume va malestura ke sanelia remi abrotcif fentugalaf aksat noveyed. Zaipa sotid rayoligas arsay gustaf gu abda, voxen viele kela gu olk ten zo tukotrayar pune gu afoltafa bada tatcesa va kostira ke gael is konira ke lava kuriston zo budeyer. Koe zaipak, denta is olyuba kake abdafa dzeta toz welkeyed. Welkera sotir wica olegasa va vala, voxen larde kela tiyir gilavackafa, pune gael me kostiyir. Numon welkeyes olk va abica vala koeon budeyena kaliapon raweyayad nume va bebafo tolvalo tunuyayad. Sinafa atrira nope graciwes gael zo azavzayar isen olk va bada ok kre teca alma keve dzeteem ke zaipak tazukayad. A vala, pakap ke zaipaf belcetaks va rekola ke klubafa blira kofiyir aze kali fenkura va zaipak arti jontika safta ok dace konak aksat batinde videweyer. Blis jijacek ke zaipak tiyir trelaf, ape cugon tolsandaf, kiren kaliapon biku voneweyed nume va kela ta abdaraykara va sinka tuvolkalvekayad. Koe Danebury, grivankeolayan zaipak va doritaxo di zanudayad : zaila is povi is sulemaf xim koe konaka kela zo katrisiyid. Ara kela wetce caxaf lird zo malsaveyed, ok ta belcetara va gabeyena taka isu ma ; batcoba nubazer da va kona migura zanudayad. Bulaf keleem ke Danebury va intaf birgeem men al mobilder. Vuestexa Cunliffe, Barry (1983), Danebury: Anatomy of an Iron Age Hillfort, Batsford Ltd, ISBN 0-7134-0998-3 Payne, Andrew & Corney, Mark & Cunliffe, Barry (2007), The Wessex Hillforts Project: Extensive Survey of Hillfort Interiors in Central Southern England, English Heritage, ISBN 978-1-873592-85-4 Wacher, John (2000), A Portrait of Roman Britain, Routledge, ISBN 0-415-03321-7

Danebury DEBALA Debala Hampshire, Engla Britana   Maneka  51° 08′ 12″ L-, 1° 32′ 15″ T- KIRA Ord Keltafa ralma Welmot 0.05 km² IZVA Zabdura ≈ 550 AGJ Jovlera ≈ 100 AGJ Ayafe sare Azilugal   Tuveli icde Izvopa