Surströmming

Surströmming
Nome	Surströmming
Procedencia	Suecia
Procedencia	Suecia
Detalles
Ingredientes	Arenga y sal
Materiales usaos	Arenga ; sal
Más información
Gastronomía	gastronomía de Suecia (es)
	[editar datos en Wikidata]

El surströmming (arenca lleldada n'asturianu) ye una especialidá de la gastronomía sueca que consiste n'arenga del Mar Bálticu lleldada. El surströmming véndese en llates, que al ser abiertes suelten un golor fuerte y fedientu. Ye por esti golor particular, que ye paecíu al pexe pasao o basoria dexada al sol mientres un par de díes, que'l surströmming tien mala fama na cultura popular, pero'l mal golor procede namái del líquidu nel que se caltién. Por causa d'esti golor, el platu suel ufiertase en comíes al aire llibre. Sicasí, abrir la llata so l'agua puede contribuyir a rebaxar el golor hasta ciertu puntu, asina como a evitar bañar a la persona que la abre en salazón, yá que la fermentadura de cutiu xenera una considerable presión dientro de la llata. La pallabra finesa pa denominalo ye hapansilakka.

L'arenga péscase en primavera, cuando ta en condición óptima y tán a puntu de reproducise. L'arenga lléldase en barriles mientres unu o dos meses, y depués ye enllatao pa siguir la fermentadura. De mediu a un añu más tarde, xeneróse abondu gas como por que les llates que yeren cilíndriques pasaren a tener una forma más arredondiada. Estos inusuales contenedores de surströmming pueden atopase en supermercaos de toa Suecia. Sicasí, delles aereollinies prohibieron estes llates nos sos vuelos, considerando como potencialmente peligrosos los contenedores presurizaos.^[1] Les responsables de la fermentadura dientro de la llata son bacteries de la especie Haloanaerobium. Estes bacteries producen dióxidu de carbonu y dellos componentes que provoquen el peculiar golor: ácidu propílicu, sulfuru d'hidróxenu (güevu podre), ácidu butíricu (mantega rancia) y ácidu acéticu (vinagre).^[2]

Una esplicación propuesta de los oríxenes d'esti métodu de preservación ye qu'empezó hai enforma tiempu, cuando salar comida yera bastante caro pol altu costu del sal. Cuando s'usaba la fermentadura, namái se precisaba la cantidá xusta de sal por que'l pexe nun se podreciera.

Preparación del surströmming

Surströmming con pataques, cebolla y pan "tunnbröd".

De cutiu cómese'l surströmming con un tipu de pan llamao tunnbröd ("pan delgao", lliteralmente). Esti pan delgao y blandiu (que nun hai de tracamundiase col pan cruxente, knäckebröd) que se comercializa en grandes llámines cuadraes que s'embadurnen de mantega. Depués amiéstase daqué de cebolla cortao y pataques fervíes pelaes y llaminaes. Les pataques son d'un tipu especial, llamaes mandelpotatis o pataca almendra.

Sácase un pexe entero de la llata y córtase a la metá. Desaníciense les sos partes blandes internes, incluyendo les güeves, de color gris escuru, y ábrese'l pexe como un llibru. Entartállase la carne colorao con un tenedor, estremando los escayos pa poder fileteala. Entós córtense porciones pequeñes, llistes pal sándwich. El toque final ye un pocu de crema agrio. Llegaos equí puede doblase o endolcase'l tunnbröd.

Tradicionalmente sírvise'l sándwich de surströmming acompañáu d'un vasu de lleche frío y un snaps. La cerveza tamién se volvió popular, anque los efectos combinaos del surströmming y la lliberación de dióxidu de carbonu de la cerveza puede ser bastante desagradable mientres un tiempu tres la comida.

Hai muncha xente que nun aprecia'l surströmming, y xeneralmente considérase como un gustu adquiríu. Y a la inversa: ye una comida suxeta a grandes pasiones (al igual que'l lutefisk).

Discutiniu

N'abril de 2006, delles compañíes aérees, como Air France y British Airways, prohibieron esti pexe a bordu citando que les llates nes que vien pueden clasificase como potencialmente esplosives pol fechu de que tán presurizaes. Tres esto dexó de vendese esti pexe nel aeropuertu internacional d'Estocolmu.

Los productores del pexe denomaron esta decisión de les llinies aérees "culturalmente illetrada", afirmando que "ye un mitu que pueda esplotar el pexe enllatao".

Sicasí, almiten que'l pexe puede emitir un fedor tarrecible. Pero esi únicu detalle, argumenten, nun puede ser abondu como pa prohibir la venta del pexe. Ente la población sueca la opinión de que ye un alimentu pa tomar al campu fuera del llar ta estendida en dellos colectivos, motivu pol que puede tar rellacionada con Midsommar, la festividá del solsticiu de branu na qu'esiste la tradición d'axuntase con amigos en zones rurales o cases de campu.^[3]

Referencies

↑ Swedish fermented herring dish considered safety risk on airlines, fishupdate.com, 28 de marzu de 2006.
↑ McGee, Harold (2004). On Food and Cooking (Revised Edition). Scribner. ISBN 0-684-80001-2. p 236
↑ «BBC News report on airline ban»

Enllaces esternos

Svenskexportmat.se - Compañía sueca que viende internacionalmente surströmming, ente otros productos llocales.
Cómo faer surströmming en casa

[1] Swedish fermented herring dish considered safety risk on airlines, fishupdate.com, 28 de marzu de 2006.

[2] McGee, Harold (2004). On Food and Cooking (Revised Edition). Scribner. ISBN 0-684-80001-2. p 236

[3] «BBC News report on airline ban»

[1]

[2]

[3]