Presidente de Trinidá y Tobagu

El presidente de Trinidá y Tobagu ye'l xefe d'Estáu de Trinidá y Tobagu y el comandante en xefe de les sos fuercies armaes. El cargu foi creáu en 1976, añu nel que'l país constituyóse como república. Enantes, el xefe d'estáu fuera la reina Sabela II del Reinu Xuníu. Sir Ellis Clarke, postreru gobernador-xeneral de Trinidá y Tobagu, xuró'l cargu como primer Presidente'l 1 d'agostu d'esi añu, nun alcuerdu de transición. Foi escoyíu formalmente Presidente por un colexu eleutoral formáu por miembros de los dos cámares del Parllamentu de Trinidá y Tobagu el 24 de setiembre, día que nel que se celebra'l día de la república.

De conformidá cola Constitución de Trinidá y Tobagu de 1976, el presidente ye la fonte formal del poder executivu. Sicasí, na práutica quien realmente gobierna ye'l Primer Ministru de Trinidá y Tobagu y el so gabinete de gobiernu. El Presidente noma como Primer Ministru al líder del partíu más votáu na Cámara de Representantes (la cámara baxa), y tamién escueye a los miembros del Senáu (la cámara alta) que son primeramente encamentaos pol Primer Ministru y pol Líder de la Oposición.

El Presidente debe de tener siquier 35 años d'edá, anque hasta la fecha nunca hubo nengunu más nuevu de 59, y tien de ser ciudadanu de Trinidá y Tobagu, y ser residente nel país nos diez años previos a la so eleición.

Llista de presidentes de Trinidá y Tobagu

Ellis Clarke: 1 d'agostu de 1974 hasta 13 de marzu de 1987.
Michael Williams (en funciones): dende'l 13 hasta'l 19 de marzu de 1987.^[1]
Noor Hassanali: 19 de marzu de 1987 hasta 19 de marzu de 1997
Arthur N.R. Robinson: 19 de marzu de 1997 hasta 17 de marzu de 2003.
George Maxwell Richards: 17 de marzu de 2003 hasta 18 de marzu de 2013.
Anthony Carmona: 18 de marzu de 2013 hasta 19 de marzu de 2018.
Paula-Mae Weekes: 19 de marzu de 2018 hasta 20 de marzu de 2023.
Christine Kangaloo: 20 de marzu de 2023 al presente.

Referencies

↑ «Trinidá-Tobagu». Archiváu dende l'orixinal, el 2016-03-07.

Enllaces esternos

Portal oficial del gobiernu de Trinidá y Tobagu Archiváu 2000-03-03 en Wayback Machine (inglés)

[1] «Trinidá-Tobagu». Archiváu dende l'orixinal, el 2016-03-07.

[1]