Naciones celtes

Suelen denominase como naciones celtes o países celtes a aquelles rexones que s'identifiquen cola cultura celta o, más específicamente, falen una llingua celta.

Oríxenes

El pueblu y la cultura celtes anicien nuna fastera oriental, los Kurganes, asitiada ente Europa y la India, poro, a estes xentes nómase-yos "indoeuropees". Esti área, güei del sur de Rusia, abarcaría mesmo les zones mostañoses de la Cordalera'l Cáucasu, que la parte baxa de les estepes allugaes al so pie, entrambos los dos mares Caspio y Negro. Dende ellí, pel 2000 enantes de la nuesa Era, al empar qu'otros pueblos indoeuropeos, les vagues celtes invadieron Europa.

Estos Protoceltes, de mano asítiense en delles fasteres d'Europa del Este: Hungría, Bulgaria, Rumanía, asina como nos países balcánicos. Dende esti área, de magar la Edá del Bronce, treslládense asitiándose fondamente pel suroeste d'Alemaña, esti de Francia y bona parte de lo que güei ye Suiza, y ye entós cuando los historiadores entamen a llamalos "Celtes". Darréu, na Edá del Fierro, nos sieglos VII al V enantes de la Era, arramárense per amplies rexones d'Europa invadiendo Alemaña, Francia y la Península Ibérica, asina como les Islles Britániques. Pel sieglu III enantes de la nuesa Era, los celtes en nueves vagues tornen otra vuelta pal Este ya invaden el norte d'Italia, Bohemia, Silesia, los países balcánicos... algamando hasta l'Asia Menor. Poro, na dómina del so mayor puxu, los celtes yeren el pueblu más abondosu y característicu d'Europa, penriba inda que los Xermanos.

Les seis naciones

Los territorios conocidos como naciones celtes son:

Bretaña, Breizh.
Cornualles, Kernow.
Escocia, Alba.
Gales, Cymru.
Irlanda, Éire.
Islla de Man, Ellan Vannin.

La Lliga Celta y el Congresu Celta sólo consideren como naciones celtes a aquelles que inda falen una de les llingües celtes.

Otres rexones

Distintes fasteres como la Islla del Cabu Bretón, en Canadá o Y Wladfa n'Arxentina asina como dellos llugares de la Península Ibérica como Asturies, Galicia, Cantabria o Lleón son fasteres d'heriedu cultural o históricu celta. Por embargu, magar que nos primeros sobreviviera una llingua celta cumpliendo asina'l criteriu de la llingua establecíu pola Lliga Celta, nun son consideraos celtes dafechu. De Galicia y Asturies, la Lliga Celta diz "anque pueden reclamar un heriedu cultural o históricu celta, nun son aceptaes como miembros de la lliga en basa a la definición llingüística de nación céltica".

Música

Una de les carauterístiques de la música celta ye una métrica pricurosa y complexa qu'amiesta una musicalidá y ritmu que puen sonar dacuando mui brétigos y aliellos, dacuando señardosos ya murnios; ya inclusive orientales cuando son a afondar nos sos raigaños centroasiáticos. El patrimoniu de la música popular celta yera bayurosu en cancios relixosos, polifoníes cencielles y temática so l'amor, la guerra ya la caza.

No que cinca a los instrumentos orixinarios ye de sulliñar la bayura de xiblates estremaes, la farpa céltica (típicu instrumentu de los bardos), la gaita o cornamusa (propiu de bretones, irlandeses, escoceses, asturianos ya gallegos), la bombarda (que n'España tien un pariente averáu na dulzaina), el violín, el cordión, ya los instrumentos de percusión primitivos tradicionales como los panderos, tambores o bodhram.

El patrimoniu cultural d'esta civilización foi codificáu al traviés del tiempu, recoyíu especialmente polos estudiosos a lo cabero'l sieglu XIX. Otra parte taba vivo na cultura tradicional d'estos países: na so música folclórica, nes sos dances y bailles, na so etnografía, nos sos vezos, creyencies y ritos. Esta tradición amestao cola música folk y el rock ye lo que dio como resultáu la música celta d'anguaño, mesmo na so versión folkie, que na folk-rock.

Ver tamién

Referencies

Enllaces esternos

Celtic League
Celtic Countries Archiváu 2010-10-10 en Wayback Machine
Isle of Man Celtic Countries Stamps (Post Office)