ENSIDESA
| ENSIDESA | |
|---|---|
| empresa | |
 | |
| Llocalización | |
| Sede | Madrid |
| Direición | España |
 | |
La Empresa Nacional Siderúrgica, Sociedad Anónima (Ensidesa) foi una compañía estatal, de capital público, fundada el 28 de xunetu de 1950 en Madrid pol muérganu estatal Instituto Nacional de Industria (INI). En 1994, y depués d'un procesu de reconversión llaboral y empresarial, pasa a enxertase na Corporación Siderúrgica Integral (CSI), empresa pública que, tres d'algamar resultaos económicos positivos, foi privatizada en 1997 baxo'l nome d'Aceralia. Completáu esi procesu cola so integración colos grupos siderúrxicos europeos Arbed y Usinor pasó a nomase Arcelor. En 2006, el grupu pasó a formar parte del conglomeráu Mittal Steel embaxo'l nome Arcelor-Mittal.
Historia
[editar | editar la fonte]La factoría, surdida énte'l déficit de producción d'acero n'España, allúgase na comarca d'Avilés (Asturies), na marxe derecha de la ría homónima. Los primeros trabayos pa la construcción del complexu siderúrxicu entámense aquel mesmu añu de 1950, sicasí, el primer fornu altu nun diba funcionar hasta'l 24 de setiembre de 1957. Esta primer instalación, inaugurada pol entós Xefe d'Estáu Francisco Franco foi bautizada col nome de la muyer del dictador, Carmen. Xunto a les primeres instalaciones d'acería (LD-1) -puesta en marcha en 1966-, llaminación y talleres auxiliares, tenía previsto una producción añal de 300.000 tonelaes de productos siderúrxicos. Los trés fornos siguientes foron prendíos en 1958, 1966 y 1969. Al empar, el complexu siderúrxicu diba estendiéndose cola construcción de trenes de llaminación, bateríes de producción de coque o una central térmica de producción de lletricidá pa dotar d'autonomía enerxética suficiente a tol complexu industrial. Al tiempu, construyéronse y punxéronse en marcha los otros trés hornos del complexu, nomaos 'Joaquina', 'Rosario' y 'Carmen IV'. Les necesidaes de consumu d'agua pela parte de la empresa llevaron amás a la construcción de dos banzaos en Tresona y La Granda.
El 22 d'avientu de 1973, intégrase n'Ensidesa la Unión de Siderúrgicas Asturianas (Uninsa), empresa que dende 1966 axuntaba dafechu l'actividá de les trés siderúrxiques históriques asturianes (Duro-Felguera, Fábrica de Mieres y Moreda-Gijón).
N'avientu de 1994, como consecuencia de la execución del Plan de Competitividá Conxuntu AHV - Ensidesa, constitúise'l grupu Corporación Siderúrgica Integral (CSI), cuyes actividaes de reorganización y reconversión de la industria siderúrxica española entamen en 1995. La reorganización de CSI conclúi en 1997 cola creación d'Aceralia Corporación Siderúrgica, integrada nel grupu européu controláu pola luxemburguesa Arbed y la francesa Usinor.
Efeutos sociales
[editar | editar la fonte]L'entamu de la construcción d'Ensidesa n'Avilés prevocó bultables cambios na sociedá de la llocalidá asturiana. El más evidente foi'l del españíu demográficu rexistráu ente 1950 y 1970, cuando según los datos del Institutu Nacional d'Estadística cuadruplicó la so población.
La empresa dio trabayu de forma direuta a más de 27.244 emplegaos (productores, na xíriga de la empresa) en 1975, y al rodiu d'ella afitóse un texíu d'industries auxiliares qu'elevaba la cifra nel so momentu cume a los 43.000 trabayadores.
.
La manu d'obra pa la nueva empresa, allugada nuna villa que malapenes superaba los 20.000 habitantes en 1950, cubrióse cola inmigración de trabayadores llegaos d'otres partes d'Asturies y, sobremanera, d'Andalucía, Galicia, Castiella y Lleón. La falta d'infraestructures p'agospiar al númberu de trabayadores emplegaos nos primeros años de la década de 1950 fizo que proliferaren soluciones improvisaes en forma de barracones, y xeneralizóse'l sistema de pensiones y agospios por hores en pensiones y viviendes privaes. Les dures condiciones de trabayu n'aquella dómina, xunío a esa falta de infraestructures, foi'l xerme del apelativu coreanos alcuñáu polos oriundos de la villa en alusión a los nuevos inmigrantes, cuyes condiciones de vida s'asociaben asina a la de les tresmitíes polos medios de comunicación de la época sobre los efeutos de la Guerra de Corea.
Nos años siguientes, la situación social foi normalizándose pol apueste fechu pol Estáu franquista en convertir Ensidesa nun exemplu del so modelu social autárquicu, según destaca l'historiador llocal Juan Carlos de la Madrid nel llibru Avilés una historia de mil años. Asina, desenvolvióse una política urbanística qu'algamó a Avilés y los conceyos vecinos, fundamentalmente a Corvera. La principal operación foi la construcción del barriu nuevu de Llaranes, dotáu con escueles, piscina, cine, centros sociales y deportivos y, nun llugar destacáu pol so altor, la ilesia. Too ello inspiráu nel diseñu de poblaos obreros británicos, con edificios d'un máximu de trés plantes y abundantes espacios verdes.
Con una concepción asemeyada llevantáronse barriaes pa obreros en Tresona (Corvera) a les que se sumaron llueu colonies en La Luz, El Pozón y, en décades posteriores, en Xixón. Al tiempu, la empresa llevantaba residenciales específicos pa los mandos de la compañía, col barriu de peritos en La Rocica o les residencies d'inxenieros nel centru d'Avilés, toes elles d'una calidá arquiteutónica y de construcción mayor, y allugaos en espacios elevaos en comparanza colos barrios obreros.
A la dotación de vivienda a los trabayadores de la empresa (por un métodu de valoración que primaba cuestiones como'l númberu de fíos o les persones al cargu del emplegáu) sumábense otros servicios, como'l sanitariu (cola construcción del hospitalillo en Llaranes) o la rede propio d'economatos. L'asistencia social algamó estayes estremaes, como les beques d'estudiu palos fíos, la formación direuta na Escuela d'Aprendices o una mutua de seguros. Desendolcóse tamién una rede de grupos d'empresa nos que trabayadores d'Ensidesa o los sos familiares podíen ocupar el so tiempu d'ociu na práutica d'estremaos deportes y aficiones nes instalaciones construyíes al efeutu pola empresa, y que yeren cásique les úniques disponibles pal conxuntu de la población de la comarca hasta l'entamu de la década de 1980. El númberu de persones asociaes a estos grupos superó les 12.000 en 1979. Ún de los esponentes d'esta estratexa de la empresa foi'l Club Deportivo Ensidesa, cuyu equipu de fútbol compitió n'arraigu col local Real Avilés, col que s'amestara en 1983.
Producción
[editar | editar la fonte]La creación d'Ensidesa surde de la necesidá del Estáu español d'aquella dómina de suplir la carencia de la producción d'aceru, lo que suponía una torga seria al desendolcu económicu d'una España entá autárquica. De fechu, les primeres instalaciones del complexu llevatábense sobre estructures de formigón que condicionaben la arquiteutura d'instalaciones como la central térmica o les primeres naves de llaminación.
Sicasí, la primer fase del proyeutu zarróse en 1.960 coles bateríes de coque, el primer fornu altu y la acería Siemens funcionando y con una producción añal de 800.000 tonelaes d'aceru, lo que facía yá d'Ensidesa la principal productora del Estáu.
| Producción total d'Ensidesa (1956-1975) | ||||
|---|---|---|---|---|
| Coque | Arrabio | Aceru | Total | |
| 1956 | 62.000 | 0 | 0 | 62.000 tonelaes |
| 1957 | 0 | 61.200 | 0 | 61.200 tonelaes |
| 1958 | 343.649 | - | 80.213 | 423.862 tonelaes |
| 1959 | 648.000 | - | 287.630 | 935.630 tonelaes |
| 1967 | - | - | 1.171.000 | --- |
| 1973 | - | - | 4.919.700 | --- |
| 1975 | - | - | 5.744.700 | --- |
La fin de la fabricona
[editar | editar la fonte]La situación económica real de la fabricona, nomatu col que se conoció a Ensidesa na comarca avilesina, nun foi esclarecida hasta la muerte del dictador Francisco Franco y el posterior entamu de la nomada transición política n'España. La empresa, col so envís social o propagandísticu, carecía d'un sistema de producción competitivu y les úniques cifres d'actividá asoleyaes hasta entós yeren les de producción y ventes. Asina, nel so llibru 175 años de la sidero-metalurgia asturiana, l'entós presidente de la Cámara de Comerciu de Xixón, Luis Adaro Ruiz-Falcó, enfotábase en 1968 nel futuru d'Ensidesa pola mor del previsible incrementu de la demanda mundial d'acero, ensin prever la posterior reconversión y despaición de la empresa, roblada en 1994 cola so integración na estatal Corporación Siderúrgica Integral (CSI), na que s'axuntaben les instalaciones siderúrxiques estatales, y llueu privatizaes.
Bibliografía
[editar | editar la fonte]- Adaro Ruiz-Falcó, Luis. (1968) "175 años de la Sidero-metalurgia asturiana", editáu pola Cámara de Comercio de Gijón (1968).
- De la Madrid, Juan Carlos (1997). "Avilés, una historia de mil años", Ediciones Azucel, Avilés. ISBN 84-86546-54-O
Referencies
[editar | editar la fonte]Enllaces esternos
[editar | editar la fonte]- Páxina del grupu siderúrxico Arcelor-Mittal Archiváu 2006-09-05 en Wayback Machine
- Coleutivu de proteición del patrimonio industrial d'Avilés y comarca
- ENSIDESA en El Alfoz de Gauzón (enllaz rotu disponible n'Internet Archive; ver l'historial y la última versión).
