Cubera

Cubera
Situación

Sede de CUBERA en Villaviciosa

Cubera ye'l nome d'un monte comunal que s'alza sobro los llombos de la villa de Villaviciosa y tamién el nome de l'Asociación d'Amigos del Paisaxe de Villaviciosa nacida en 1983, como entidá ciudadana que fizo del mediu ambiente, de la cultura, de la historia del arte local, y del paisaxe, una causa. Recibió'l Premiu a Pueblu Exemplar en 1991, de la mano del entós herederu de la corona Don Felipe de Borbón Príncipe d'Asturies, güei Rei d'España Felipe VI.

Fundación

Nel branu de 1983 nació la idea de la creación d'una Asociación ciudadana pa la defensa, potenciación de la redolada natural y de la riqueza cultural de Villaviciosa, motivada pola creciente degradación de la Ría, del paisaxe rural y urbano de Villaviciosa. Pretendíen espertar l'interés de tolos villaviciosinos escontra'l patrimoniu artísticu y históricu, la estética de les construcciones nueves, el campu, les sableres y la Ría. El so oxetivu yera'l de crear un movimientu ciudadanu en defensa del paisaxe medio natural y urbanu- del conceyu.

El día 19 d'agostu de 1983 celebróse una xunta na que les venticuatro persones asistentes decidieron constituyise n'asociación, quedando llegalizada'l 25 d'ochobre d'ese mesmu añu. La primer xunta directiva tuvo presidida pol escultor, pintor, diseñador y fotógrafu asturianu Joaquín Rubio Camín. El presidente dende 1999 hasta la so muerte en 2022 foi'l maliayés teólogu, filósofu y escritor, Etelvino González López, miembru del Real Institutu d'Estudios Asturianos (RIDEA) en representación de la Xunta Xeneral del Principáu.

“Pueblu Exemplar”

Para Cubera el fechu de ser Pueblu Exemplar tien una permanencia más allá de les feches de concesión, amosándose como una "asociación viva y con causes que siguen espertando l'interés de la sociedá".

Según Etelvino González López, presidente de l'Asociación dende 1999, señaló que “somos unes 500 persones que fiximos del mediu ambiente, de la cultura, de la historia del arte local, y del paisaxe, una causa. Otorgaronnos munchos galardones, y hai 20 años consiguimos qu'a Villaviciosa la estremaren col Premiu de Pueblu exemplar d'Asturies.” Según López, la concesión del Premiu Pueblo Exemplar d'Asturies “vieno refrendar aquello polo que tábamos lluchando(…) Pero sobremanera a lo llargo de los más de 30 años foi una esixencia, una responsabilidá de caltenenos al altor y perfeccionar lo que tábamos faciendo”. Ramón García Cañal, entós Vicepresidente del Principáu d'Asturies y miembru de Cubera dende la so fundación, definió la entidá como "una asociación que nació col espíritu de defender el progresu y el mediu ambiente en Villaviciosa y de crear conciencia, pos munches vegaes les instituciones, los que tamos en cargos políticos, riquimos que nos recuerden na nuesa conciencia qu'unu de los oxetivos ye la defensa de los espacios naturales, la defensa de la nuesa redolada, que dacuando escaecemos o sacrificamos en beneficiu d'otros intereses que son a cencielles económicos”.

Actuaciones

Dende la so creación Cubera tien como oxetivu contribuyir al caltenimientu, recuperación y espardimientu del patrimoniu cultural (históricu- artísticu, etnográficu) del conceyu de Villaviciosa, a tenor de los sos estatutos (art. 6, c). Para ello sírvese de la so revista cultural, los sos cuadiernos, los sos estudios, cursos, premios y publicaciones, según les sos actuaciones énte l'Alministración y la sociedá. Según l'artículu númberu 4 de los sos estatutos, Cubera propónse actuar énte l'Alministración local, autonómica y central, y énte la opinión pública.

Actuaciones énte l'Alministración (local, autonómica y central) y la sociedá

A lo llargo de los años son múltiples les actuaciones que l'asociación llevó a cabu en tolos niveles de l'Alministración y al traviés de los medios de comunicación. Fundamentalmente n'asuntos tales como:

1. Contaminación de la ría.
2. Degradación del hábitat rural o urbanu.
3. Planes d'ordenación.
4. Proyeutu de carretera y autovía: Ellaboración con otros grupos culturales y políticos locales d'un manifiestu en pro d'una bona carretera y en defensa de la ría de Villaviciosa (Apéndiz II).
5. Recuperación d'horros y paneres.
6. Catálogu de les cases mariñanas pol so interés arquitectónicu.

Pero de toes elles quepe destacar dos no artístico y monumental: la defensa del monesteriu de Valdediós, y no relativo al mediu natural la defensa de la ría de Villaviciosa. En 1986 l'Asociación llanzó una campaña col lema "Salvái Valdediós" pa lo que se constituyó una comisión. En 2014 énte l'abandonu del cenobiu vuelve retomala. Ye precisamente un ajimez el logotipu de l'asociación.

Publicaciones

La ecoloxía, el paisaxe, la flora y fauna del conceyu de Villaviciosa, según l'arqueoloxía, l'arquiteutura, la etnografía, l'urbanismu, la hestoria y los sos personaxes tán siempres presentes nes publicaciones de Cubera fieles al oxetivu fundacional.

• Revista Cubera.
• Cuadiernos monográficos.
• Otres publicaciones demuestra esta meyora.

Premios concedíos

Premiu d'Investigación sobro Villaviciosa, abiertu a los alumnos de doctoráu o máster de cualquier universidá española (nos sos entamos llindada a los matriculaos na Universidá d'Uviéu) pretende promover les investigaciones sobre la realidá actual y histórica del conceyu de Villaviciosa y completar los tresformamientos del conceyu a lo llargo de los sieglos al traviés de la investigación. Cubera concede tamién la reconocencia de "L'Aldea más guapa" colo que se pretende destacar el trabayu de mancomún realizáu polos vecinos na so aldega.

Distinciones recibíes

L'Asociación Amigos del Paisaxe Cubera, de Villaviciosa, foi estremada col máximu galardón que da'l Centru Asturianu de Madrid a un coleutivu pol so llabor en defensa de la naturaleza y la cultura autóctona».

Enllaces esternos

• Web de Cubera
• Web de la Fundación Princesa d'Asturies 

• Datos: Q21480565