Catálogu SAO
El Catálogu SAO (n'inglés Smithsonian Astrophysical Observatory Star Catalog) ye un catálogu estelar realizáu pol Smithsonian Astrophysical Observatory en 1966. Na so primer versión constaba de 258.997 entraes. Ye un catálogu fotográficu llindáu en magnitú aparente, polo qu'axunta la totalidá de les estrelles más brillantes con valor llende en banda V. El catálogu ye completu hasta la novena magnitú, magar tamién contién estrelles más tenues,lo mesmo que 4.503 estrelles de magnitú mayor que 10. Toles estrelles que pueden vese a güeyu tán comprendíes nel catálogu.
Les estrelles del catálogu nómense según la convención SAO NNNNNN, onde NNNNNN ye un númberu comprendíu ente 1 y 258.997. Les estrelles tán clasificaes en 18 bandes de 10 graos de declinación menguante; d'esta forma, les estrelles SAO 1 a SAO 4015 tienen una declinación ente 80º y 90º, les estrelles de SAO 4016 a SAO 10936 una declinación ente 70º y 80º, mentanto que les estrelles SAO próximes a 250.000 tienen una declinación negativa.
Pa cada estrella, el catálogu amuesa la so posición (en coordenaes B1950.0 o J2000.0), una estimación del error de posición, el movimientu propiu y una estimación del error del mesmu, les coordenaes galáctiques, la magnitú fotográfica en banda V, el tipu espectral, ya información sobre la variabilidá de la estrella.
Exemplos
[editar | editar la fonte]Na siguiente tabla figuren entraes del catálogu SAO de delles conocíes estrelles.
Númberu de catálogu SAO | Nome común | Constelación | Magnitú aparente | Carauterístiques destacables |
---|---|---|---|---|
SAO 240019 | Gacrux (γ Crucis) | Crux | 1,6 | La xigante colorada más cercana al Sistema Solar |
SAO 72077 | Pi2 Pegasi | Pegasu | 4,4 | Xigante mariella arrodiada d'un discu de materia |
SAO 227375 | Zeta1 Scorpii | Scorpius | 4,9 | Hiperxigante azul y una de les estrelles más masives que se conocen |
SAO 62377 | Lalande 21185 | sietestrellu | 7,6 | Cuarta estrella más cercana al Sistema Solar; puede tener n'órbita dos planetes |
SAO 138714 | HD 107148 | Virgo | 8,3 | Nana mariella con un planeta estrasolar |
SAO 20575 | BD 60 2522 | Casiopea | 8,7 | Estrella central de la nebulosa NGC 7635 |
SAO 72884 | ADS 16402 | Lacerta | 9,2 | Estrella binaria compuesta por dos nanes marielles; alredor d'una d'elles hai n'órbita un xigante gaseosu enforma próximu a la estrella |
Ver tamién
[editar | editar la fonte]- Catálogu Henry Draper
- Bright Star Catalogue
- Catálogu Hipparcos
- Boss General Catalogue
- Bonner Durchmusterung