Río Xalón

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Xalón Jalón
Río Xalón en pasando por Terrer.
Administración
Estaus	{{{estaus}}}
Territorios	Castiella y Leyón Aragón
Cheografía
Longaria	224 km
Altaria d'o naixedero	m
Naixedero	Sierra Ministra
Desembocadura	río Ebro
Hidrolochía
Superficie d'a cuenca	9.338 km²
Cabal meyano	20,8 m³/s
Mapa
O Xalón en Aragón

Lo río Xalón u río Exalón ye un río aragonés afluent d'Ebro que naixe en sierra Ministra, en la provincia de Soria y caye en Ebro en Torres de Berrellén en la provincia de Zaragoza. La suya longaria ye de 224 km, desauguando una cuenca hidrolochica con una superficie de 9.338 km² con un cabal meyo de 20,8 m³/s.

Toponimia

Marco Valero Marzal lo clama Salo (con terminación de chenitivo -ONIS, d'astí lo sufixo -ón actual), Chustín lo clama Birbilis como l'antiga ciudat cerca de Calatayú. Los cheografos de lo periodo periodo musulmán ya mencionan un río Xalūn que daba nombre a una comarca entre Ricla y Cabanyas d'Ebro. L'aragonés ha preso este hidronimo present en latín a traviés de l'arabe, d'astí la presencia de lo fonema de la x en un etimo con s en latín como en Exeya d'os Caballers y en Exatiba. En aragonés medieval ha existiu la variant Exalón.

En los composaus toponimicos Xalón va sin d'articlo: Val de Xalón, Fuent de Xalón u en lo termin descriptivo ribera de Xalón (visible "Anales de la Corona de Aragón" y en "Historia de la economía politica de Aragon"). Encara se conserva sin articlo en la locución ir como Jalón por Mediavega con lo significau d'"ir incontroladament" en Morata de Xalón y Chodes.

Cheomorfolochía

La zona occidental de la suya compleganza se fa mes grant a costa de las compleganzas de lo Río Tacho y de lo Duero por procesos de captura fluvial.

Muitos de los suyos afluents a lo largo de tot lo curso tienen direccions perpendiculars a Xalón, travesando entre sierras y fallas con ixas mesmas direccions.

Encomienza a ixamplar-se en Arcos de Xalón, a on que se troba materials terciarios poco resistents de la depresión de Mont-reyal de Fariza u fondada de Fariza, a on que recibe los afluents Nágima y Algadir.

Torna a estretir-se en la roca en lo plego calsinoso d'Alfama d'Aragón. Y cruza con recolons en los materials paleozoicos de Bubierca, de la branca aragonesa de lo Sistema Iberico. Estos primers materials paleozoicos perteneixen a lo macizo d'Ateca, que queda despartiu por Xalón en sierra d'Ateca a lo norte y sierra de Pardos a lo sud. En este tramo recibe los afluents Monegriello, Piedra, Mesa y Manubles.

En la depresión de Calatayú y Mont-albán, aproveitando que lo cheso ye poco resistent, ixampla la suya ribera y val, pero con una ripa en la marguin ezquierda, la mesma marguin baixo la sierra d'Armantes, y recibe los afluents Xiloca, Miedes y Ribota.

Dimpués de deixar ixa depresión torna a tallar materials paleozoicos formando las Foces de Xalón con recolons en lo substrato rocoso. Estos segundos materials paleozoicos perteneixen tamién a la branca aragonesa de lo Sistema Iberico pero se situan en lo macizo de Calatayú y Mont-albán, que Xalón desparte entre la Sierra de la Virchen a lo norueste y las sierras de Bicort y Algairén a lo sudeste.

Dimpués d'ixas sierras entra en la Depresión d'Ebro, a on que recibe los afluents Aranda, Griu y Alpartil.

Lo zaguer tramo ye recto y perpendicular y seguntes lo cheologo Josep Gisbert Aguilar aproveita lo trazau d'una falla. En Torres de Berrellén caye en Ebro.

Bibliografía

• (es) Eduardo Viñuales Cobos: Red Natural de Aragón. Comunidad de Calatayud nº 17. Prames, 2007, pp 32–33.
• (es) Prensa Diaria Aragonesa: Los ríos de Aragón. El Río Jalón. El Periódico de Aragón, Diputación General de Aragón, 2005.

• Datos: Q20380
• Multimedia: Jalón River / Q20380