Trillo (Clamosa)
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo tracta sobre Trillo que ye un lugar d'A Fueva. Ta altros usos d'a palabra «trillo» se veiga Trillo (desambigación).
Trillo | |
Lugar d'Aragón | |
Entidat • País • Provincia • Comarca • Municipio |
Lugar![]() ![]() Sobrarbe A Fueva (municipio) |
Partiu chudicial | Boltanya |
Población • Total |
3 hab. (2011) |
Altaria • Meyana |
660 m. |
Distancia • 102 km • 26 km • 11,7 km |
enta Uesca enta L'Aínsa enta Tierrantona |
Codigo postal | 22438 |
Patrons | Sant Lorient |
Parroquial • Diocesi • Arcipestrau |
Balbastro-Monzón Sobrarbe-Ribagorza |
Coordenadas | |
Trillo ye un lugar aragonés en o municipio d'a Fueva, en a comarca de Sobrarbe y a provincia de Uesca. A suya población ye de 3 habitants (2011[1]).
Cheografía
[editar | modificar o codigo]Trillo se troba en un cerret chicolón, en a baixant norte d'o barranco d'o Salinar en a val d'a Cinca, y no fa pas parte d'a subcomarca natural d'a Fueva anque se trobe incluito en o municipio homonimo. Ye en as garras d'o tozal de Trillo (u «de Sant Marcos», por a ermita que i hai en l'altura), que quita o nombre d'o lugar. Como tamién pasa con Clamosa y a Penilla, que i son amanaus, Trillo presenta una disposición constructiva que fa pensar d'un planiamiento defensivo medieval, talment como fortificación u per haber naixido como estructura defensiva.
Se troba comunicau con una pista asfaltada con Salinas de Trillo, que enantes yera una aldeya suya pero que en l'actualidat o supera en población. Guarda tamién camins tradicionals con Sant Per de Trillo (en a mesma man d'o barranco) y con Caneto que se troba en a cuentra, y disposa d'un enlace con a carretera de Ligüerre d'a Cinca ta Tierrantona que ye transitable ta cualsiquier vehiclo y o mete en comunicación con a suya cabecera municipal y con a carretera autonomica A-138 (Bielsa-Balbastro).
Urbanistica
[editar | modificar o codigo]Trillo se forma de tres barrios deseparaus con cualques metros os uns d'os atros. O mas antigo de toz tres pareix que estaría o barrio d'a ilesia, «o Barrio», a on que se troba a ilesia parroquial (parcialment en enrunas), consagrada a Sant Andreu, y cualques casas mas modestas como Casa Ardanui,[2] Casa Gamisel[2] etc. En o Barrio se troba un puntón de penya en o que as fuents situan o castiello, enguán auxidido.
Unatro barrio ye «a Plaza»,[2] que presenta una cruz de suelo en mitat, y l'arredolan as casas Cambra, Noguero y bellas altras. O tercer barrio ye «o Planiello», que contiene a ferrería.[2]
Historia
[editar | modificar o codigo]Trillo yera capital d'un municipio que heba nombre Trillo tamién, y se bastiba con os lugars de Salinas y Sant Per, ademés de lo propio Trillo. O municipio desapareixió en o periodo intercensal 1842-1857 en absorvir-se por o municipio de Clamosa.[3][4] Dende a decada de 1960, Trillo y as suyas antigas aldeyetas se troban integradas en o municipio d'a Fueva.[3][4]
En a Edat Meya, o divulgador Manuel Benito Moliner considera que Trillo se creya como bella fortificación u posiblement «torre» defensiva en o sieglo XI[2] dimpués d'a caida en mans cristianas d'os castiellos de l'Abizanda y de Clamosa, alto u baixo en a misma epoca que gosa contruir-se o castiello de Troncedo. Se tractaría, pues, d'una fundación propiament cristiana y no pas, como en os casos de Clamosa y l'Abizanda, de fortificacions musulmanas presas y reutilizadas por os cristianos.
En os sieglos XIII y XIV a fortificación de Trillo perteneix a la Corona.[2] En 1391 le'n trespasan a Pero Esplugas,[2] pero en 1458 o castiello y a población son intervenidos por Chuan lo Gran[2] que da la orden d'ocupación con tropas reyals ta privar as desfierras de dos familias nobles que se'l disputaban. Le'n vendión a'l barón de Monclús Rodrigo Rebolledo por 12.000 florins d'oro.[2]
Economía
[editar | modificar o codigo]Trillo teneba un molín d'olio a'l canto d'o barranco de Santa Brichida, confluyent con el d'o Salinar, que data de l'anyo 1802.[2] En os anyos 1980 yera vesitable y l'historiador Manuel Benito Moliner, que i estió, fizo una descripción d'él en a cual s'ilustra como un edificio a on que a maquinaria yera conservada y encara s'hese puesto fer servir ta molienda,[2] de no haber estau o lugar despoblau por ixas envueltas. Tamién i existió una pedrera de calso, que s'ha puesto documentar activa dica os anyos 1950.[2]
As fincas agricolas mas amanadas a la localidat se trobaban en as garras d'o tozal de Sant Marcos, y se repartiban en dos suertes principals que heban nombre «as Costeras» y «os Solanos»,[2] todas dos feitas de faixetas en a versant. En a cuentra d'o barranco d'o Salinar, camín ta Caneto, se troba mas fincas mas extensas y de millor cantimplano, anque por a suya ubicación sufriban l'ubago de lo propio mont de Caneto.[2] Ista zaguer partida de fincas recibiba lo nombre de «as Serviellas».[2]
Demografía
[editar | modificar o codigo]A primer noticia que se tiene d'a existencia de Trillo ye de l'anyo 1279,[5] y o primer censo aproximau de 1488, cuan que se da una población de 10 vecins[2] (casas) en a localidat. En o sieglo XIX, se fa estimación que d'alto u baixo en podese tener deciséis u decisiet a lo largo de tot lo sieglo, con o solo dato que en o censo de 1842 en teneba 25[3] tot lo municipio, con 186 personas que i vivisen.[3]
| ||||||||||||||||||
| ||||||||||||||||||
| ||||||||||||||||||
1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE. |
Toponimia
[editar | modificar o codigo]D'alcuerdo con Manuel Benito Moliner, o nombre de Trillo puede dimanar d'a palabra «torre»[6] a traviés de bella evolución d'o tipo de Torrillo > T'rillo. Isto l'emparentaría con belaltros lugars d'Aragón, como Torrillo en o Xiloca y Torrillas en a comarca de Gúdar-Chabalambre.
A teoría de Manuel Benito conta en a suya favor con a disposición de o lugar en una altura en un cerret, que o faría facilment defensable, y que no fa guaire dificil imachinar-se que d'antes que no a población como en l'actualidat se conoix, i hese puesto haber en o suyo emplazamiento bel edificio u estructura defensiva, como una torraza, ta cosirar a valleta d'o barranco d'o Salinar.
Imáchens
[editar | modificar o codigo]-
Campanal de a Sant Andreu.
-
O tozal de Trillo, que sinyorea o paisache local.
Fiestas
[editar | modificar o codigo]- 20 de chinero, fiesta d'hibierno,[7] fendo-le honras a Sant Sabastián.
- 24 d'abril, romería ta'l santuario d'a Madama de Bruís.[7]
- 10 d'agosto, fiesta Mayor, fendo-le honras a Sant Lorient.[7]
Referencias
[editar | modificar o codigo]- ↑ (es) «Trillo» en a subpachina «Relación de unidades poblacionales» d'o Instituto Nacional de Estadística, consultada o 22 de marzo de 2012.
- ↑ 2,00 2,01 2,02 2,03 2,04 2,05 2,06 2,07 2,08 2,09 2,10 2,11 2,12 2,13 2,14 2,15 (es) Despoblados del antiguo municipio de Clamosa por Manuel Benito Moliner; consultau o 30 de noviembre de 2010.
- ↑ 3,0 3,1 3,2 3,3 (es) «Trillo» en a pachina «Alteraciones de los municipios en los Censos de Población desde 1842» d'o Instituto Nacional de Estadística, consultada o 30 de noviembre de 2010
- ↑ 4,0 4,1 (es) «Clamosa» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada l'1 de noviembre de 2010
- ↑ (es) «Trillo» en a pachina oficial de l'achuntamiento d'A Fueva, consultada o 30 de noviembre de 2010.
- ↑ (es) Índice de pueblos del Alto Aragón, el orígen de sus nombres. Por Manuel Benito Moliner. Consultau o 30 de noviembre de 2010.
- ↑ 7,0 7,1 7,2 (es) Calandario de fiestas en a pachina oficial de l'achuntamiendo de a Fueva; consultada o 30 de noviembre de 2010.
Vinclos externos
[editar | modificar o codigo]
Lugars d'o municipio d'a Fueva | |
---|---|
Poblaus: Aluchán | Buetas | A Cabezonada | Caneto | Charo | Clamosa | Formigals | Fosau | Fuent de Campo | O Lumo de Muro | O Lumo de Ranyín | A Lueza | Mediano nuevo | Moriello de Monclús | O Pocino de Charo | Ranyín | Salinas de Trillo | Sant Chuan | Sant Mitier | Sant Per | Solipueyo | Tierrantona | Trillo | Troncedo Despoblaus: L'Alquería de Cotón | Arasanz | L'Atiart | Bediello | Benedet | Carrera | A Corona | A Cuesta | Fumanal | Ixantigosa | A Lecina | O Lenero | A Marinyosa | O Mediano | Mediano viello | Ministirio | Moliniás | Montero | A Mula | Muro de Roda | A Nau | A Olivera | O Pamporciello | La Penilla | A Plana | O Plano | Rolespé | Sant Per de Trillo | A Selva | A Sierra | Solaniella | O Sotero | Susiaz | A Torre | A Villa |