Taxón
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Un taxón (foneticament /tak'son/) u taxon (/'takson/, ye un cultismo que dimana d'o griego τάξις, transliterau como táxis y pronunciau /'taksis/, «ordenamiento») ye un grupo d'organismos emparentaus que, en una determinada clasificación, han estau agrupaus en asignando-les un nombre cientifico en latín, una descripción en o caso que sía una especie, y un tipo nomenclatural. Toda descripción formal d'un taxón s'ha de figurar asociada a lo nombre d'os suyos autors, que s'escribe dezaga. A disciplina que define os taxons ye a taxonomía.
A finalidat de clasificar os sers vivos en taxons definius formalment por cuentas de grupos informals ye de proveyer agrupacions que tiengan una circunscripción (ixo ye, de cuals organismos se composa) que sía estricta y con una nomenclatura universal, independientment d'a lengua que s'emplegue pa la comunicación.
S'ha de parar cuenta que os taxons se troban adintro d'una clasificación dada, subchecta a cambeos y sobre a cual i puede haber discrepancias.
Taxons y categorías taxonomicas
[editar | modificar o codigo]Cada escuela de clasificación biolochica agrupa os organismos de manera diferent. En a cladistica y evolucionista, os táxons tienen un nombre seguntes os Codigos Internacionals de Nomenclatura, y son grupos monofileticos d'organismos emparentaus en o caso d'a cladistica, y en a evolucionista s'admite tamién como táxons os grupos polifileticos.
A escuela fenetica, por contra, considera os táxons en función de caracters morfolochicos comuns sin parar cuenta de si son homolochías u analochías producto d'una evolución converchent. Por ixo, en a clasificación fenetica d'os organismos, pasa muit a sobén que os táxons sían grupos parafileticos, condición muit refusada por as escuelas de demés.
D'una manera prou cheneral, se podría dicir que un táxon ye un grupo d'organismos asociaus a uns atributos que determinan a pertinenza d'ixe organismo a lo grupo. Seguntes o pensamiento cladista, ademés, ixes atributos han d'estar concretament homologos; ixo ye que dimanen d'un antecesor común.
A taxonomía emplega categorías taxonomicas que s'ordena de manera hierarquica. En ixe esquema organizativo, cada grupo d'organismos ye un taxón y o livel hierarquico a on que se trobe ye la suya categoría taxonomica. As categorías taxonomicas d'uso regular son (en orden de mas cheneral enta mas concreto):
- Dominio.
- Reino.
- Filo (en animals y plantas) u División en Botanica.
- Clase.
- Orden.
- Familia.
- Chenero.
- Especie.
S'ha de fer notar que a pertinenza d'un táxon a un ran particular (categoría) ye una caracteristica d'un modelo de clasificación concreto (sistema). Isto puet causar que un mesmo taxón ocupe categorías diferents en sistemas diferents,seguntes l'autor, o criterio que s'emplegue, etc.
