Saraviello
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Saravillo | |
| Entidat local menor d'Aragón | |
 Vista parcial de Saravillo. | |
| Entidat • País • Provincia • Comarca • Municipio |
Entidat local menor Aragón.svg){kind=small} UescaSobrarbe Plan |
| Partiu chudicial | Boltanya |
| Población • Total |
79 hab. (2005) |
| Altaria • Meyana |
950 m. |
| Distancia • 152 km • 32 km • 7 km |
enta Uesca enta l'Aínsa enta Plan |
| Codigo postal | 22366 |
| Chentilicio | saravillenco |
| Parroquial • Diocesi • Arcipestrau • Parroquia |
Balbastro-Monzón Sobrarbe-Ribagorza Asumpción de Ntra. Sra. |
| Coordenadas | |
 Esta fuella ye escrita n'el parlar de la Comuna.
|
Saravillo, historicament dito Saraviello[1] en aragonés (oficialment y en castellano, Saravillo) ye un lugar d'el municipio de Plan, mas abaixo d'esta villa, ta la coda d'a val de Chistau, an que s'achunta el barranco d'el Mont con el Cinqueta, a l'endrecho de la Comuna.
El lugar se troba a poqueta distancia de la carretera que puya ta Chistau, 1 km t'alto a la dreta d'ésta per la pista sinyalada tot puyando per el camín de Salinas ta alto, de 100 metros radius antes de pasar el esbarre de la Comuna y no mas de 500 metros d'antes d'es tunels de La Inclusa. Saravillo cal mirar-se-lo malas que se puya, y te'l trobas esflamiciau en las faixetas de Las Lerosas (Punta Calva) a'l canto d'el barranco de la Espuena.
El lugar de Saraviello ye el puesto de salida d'an que se puya ta la Basa de la Mora, per la pista de La Imant, en es pasos de la punta Calva, dimpués chira un poquet per debaixo d'el Pinar de la Freda y se fica ta la valleta d'el barranco de Galliners. Cuan ye difuera d'el barranco, la pista pasa per La Solana de la Inclusa y enfila ta alto per la vesant de la punta d'es Litars, ta'l cubilar de Labasar que ye el zaguer recuesto d'an que mas luego torna a baixar ya ta la vallonada an que ye l'ibón.
Si se fa la puyada per la pista de Labasar, que sigue el barranco d'es Galliners y pasa per Vaticiellas, se puet yir ta la falda de la penya de la Una (2681 m) que ye la Ereta d'as Bruixas, an que complega tamién la pista d'el Collau de la Ribereta que ye un paso de mal esnabesar dende la Basa de la Mora. Dos camins ta'l mesmo puesto.
Saravillo ye, tamién, el puesto que ye prencipal ta foter-se n'el Macizo de Cotiella, perque tiene pistas regulars y bien fetas ta puyar-ie, mesmo que ta alto ta voltorín e La Llerga, per la pista que enfila ta la ermita de Santa Isabel.
Toponimia
[editar | modificar o codigo]El nombre que dan a'l lugar es suyos vecins ye coincident con el nombre oficial, Saravillo. Manimenos, la forma historica documentada, y que corresponde con la fonetica aragonesa, ye Saraviello, encara que i hai testimonios antigos que el documentan como Zarandiello (forma popular antiga), u Sartaviello (en el Fogache de 1495). En l'aragonés de la Valle de Tella se documenta encara Saraviello:
A parla de Saravillo
[editar | modificar o codigo]Dende el punto de vista lingüistico, Saravillo conserva l'aragonés chistabín con es mesmos rasgos comuns de la Comuna (Sin, Senyes, Serveto) pero con un mayor grau de castellanización y menor vitalidat. L'aragonés d'estes cuatro lugars se caracteriza per l'emplego del pasau sintetico en cuenta del pasau perifrastico emplegau en es lugars de Chistén, San Chuan y Plan. Asinas emplegan: puyón, baixez, fayón, dicié, vayón, frent a van puyar, voz baixar, van fer, voy decir, van dir, que son las formas d'es lugars de Chistén, San Chuan y Plan. A ran de lexico, ye común con tot Sobrarbe y mas que mas con la Vall de Chistau, encara que cuenta con bela parola propia de l'aragonés de Saravillo como ye "amadul" (martuel).
Ha escrito en aragonés de Saravillo, Joaquina Mur, en el libro "mas d'antes en Saravillo, vida y parlaje" editau per el REA y con introducción y estudio lingüistico de Fernando Romanos.
Mosén Bruno
[editar | modificar o codigo]
- Se veiga l'articlo prencipal: Mosen Bruno Fierro.
En Saravillo fayó exercicio de mosen, n'el sieglo XIX, el famoso Bruno Fierro, el cura mas conoixiu de tot Sobrarbe. De las fetas, tozoladas y farinazos d'el mosen montanyés nos n'ha quedau encara buen celemín n'el decir popular de la chent de la valle y per tot Sobrarbe enlá. D'él s'ha dito que no teneba el costumbre de decir de vusté a dengún, pos que deciba que "en habendo tractau de tú a Dios mesmo, no podeba fer mas cosa".
A la virchen que ye prencipal y matrona d'el lugar, a Virchen d'Agosto, diz que le teneba tantas confianzas, que vayó un diya a pescar ta el Cinqueta estando-ie tot el maitín y que no en quitó mica peix, y tot rematando se'n salió difuera d'el río y no heba puisto agarrapizar que una trucheta que no feba el gran d'el dido d'uno. Alavez, farto como yera de pescar y marchar sin res, se'n vayó ta alto ta'l lugar y se metió a escape en a ilesia, con el peixet en las mans, y carranyoso que yera, a carranyar a la virchen per no haber-le dau un d'es peixes granizos que tanto se feban viyer n'el río.
Atra cosa que fayó, metió el lugar de Saravillo n'es libros d'historia perque aduyó a que el cheneral Prim pasase ta Francia per un d'es camins de contrabando que él tan bien conoixeba, per la ribera Sallena y el Puerto d'Ordiceto, ta que se podese exiliar.
Fiestas
[editar | modificar o codigo]- La nuet d'el 17 de chinero, Sant Antón, arriban d'alto de Chistau en procesión fendo escatapurcio es vecinos d'es lugars de part d'allá (Plan, Sant Chuan y Chistén) que baixan en romería fendo trucar es trucos ceremonials en la procesión dita Es trucos de Sant Antón, que remata per part d'aquí.
- El primer sabado d'el mes de chulio se fa la romería ta alto ta la ermita de Santa Isabel.
- 15 d'agosto, Fiesta Mayor fendo honors a virchen d'Agosto.
Referencias
[editar | modificar o codigo]- ↑ 1,0 1,1 (es) Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010, p 257.
Se veiga tamién
[editar | modificar o codigo]Vinclos externos
[editar | modificar o codigo]
Se veigan as imáchens de Commons sobre Saraviello.- (an) Estatisticas de Saraviello n'el portal AragonEsAsi.com
- (es) La localidat en LosPirineos.info
- (es) Mosén Bruno Fierro en la Gran Enciclopedia Aragonesa Online
| Lugars d'o municipio de Plan | |
|---|---|
| Poblaus: Plan | Saraviello | Serveto Despoblaus: Senyes |
