Crassulaceae

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Crassulaceae
Crassula ovata. Posiblement, una d'as crasulacias mas difunditas como planta ornamental.
Denominacions populars
Crasulacias
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Saxifragales
Familia:	Crassulaceae
Descripción
Crassulaceae J. St.-Hil., 1805

As crasulacias (cientificament, en latín, Crassulaceae (J. St.-Hil., 1805)) son una familia de plantas crasas en a orden d'as Saxifragales. Bi n'ha bellas 1300 especies, clasificatas en 48 cheneros,^[1] anque, como a sobén pasa en Taxonomía botanica, istas cifras pueden variar seguntes as fuents y os autors.

Descripción

As crasulacias son normalment plantas herbacias u sub-arbustivas. As fuellas son simples, con disposición variable en o trallo; bi n'ha especies alternifolias, de fuellas oposatas u que forman cualque roseta basal. Una caracteristica universal de todas as crasulacias (anque no exclusiva d'ellas) son as fuellas crasas, adaptación a hábitats secos, a on que os eixemplos d'a familia i son mas abundants.

As flors son hermafroditas, con verticilos pentamers, tretramers u multimerals. L'androceu ye fusionau con o chineceu en a base, os estambres, en o mesmo numero que a resta de verticilos, tipicament subresurten un poquet por alto d'a corola (son mas largos que os petalos). O chineceu ye supero, a sobén con carpelos libres u soldaus solament que por a suya base. As flors son cuasi siempre agrupatas en inflorescencias de tipo cimoso.

Metabolismo CAM

Una caracteristica fundamental d'as crasulacias, que se considera una innovación evolutiva d'ista familia que podría (d'alcuerdo con bel autor) haber facilitau o suyo exito ecolochico, ye o metabolismo que tienen. As crasulacias son plantas CAM, sigla que significa Crassulaceae Acid Metabolism - Metabolismo Acido d'as Crasulacias en anglés. O metabolismo CAM en as plantas se caracteriza porque tienen o ciclo fotosintetico deseparau en dos fases, una fase luminica (fase fototrofa) que fan en presencia de luz, y unatra fusca (fase sintetica), que fan de nueiz. Isto ye por contra de como lo fan a resta d'organismos fotosinteticos, que tienen toz os pasos d'o ciclo simultanios.

Se considera que o metabolismo CAM ye una adaptación a os climas aridos, pus minimiza las perdas d'humedat, tot garantido que a planta no tiene que ubrir os estomas y intercambear gases con l'atmosfera sique de nueiz, cuan a temperatura y sequedat y por tanto a evaporación de l'augua ye menor.

Gracias a iste tipo de metabolismo, cualques especies de plantas crasulacias pueden colonizar biotopos que estarían masiau inhospitos ta belatros grupos de vechetals. O metabolismo CAM, por contra, ye menos eficient que os metabolismos fotosinteticos convencionals, por a cual cosa as crasulacias son de regular menos productivas en biomasa que os atros grupos de plantas, y se troban en desavantalla ecolochica contra ellas siempre que as condicions no sían restrictivas en cuanto a humedat.

Clasificación

Como muitas vegadas pasa en Biolochía, a clasificación d'os diferents sub-clados de Crassulaceae ye firmement discutida por diferents autors, que sostienen diferents tiorías sobre cómo habrían d'estar clasificadas istas plantas. A solideza d'a familia biolochica, manimenos, ha quedau demostrada con os estudios de chenetica molecular,^[2] y o que se disputa ye solament o numero d'especies, cheneros y sub-familias que concabe.

Una d'as clasificacions clasicas, a de Berger de 1930, comprendeba la sub-división d'ista familia en 6 sub-familias y 35 cheneros.^[2] Istas sub-familias yeran Crassuloideae, Kalanchoideae, Cotyledonoideae, Sempervivoideae, Sedoideae y Echeveroideae.^[3] A dita clasificación de Berger ha estau muit discutida, pero s'ha considerau a de referencia mientres buena cosa d'o sieglo XX. De todas ixas sub-familias, nomás Crassuloideae, Kalanchoideae y Sempervivoideae s'han manteniu por belatros autors, y solament de Crassuloideae se'n tiene certeza en a necesidat de mantener-la en todas as clasificacions que s'ha feito.^[2]