Vorlage:Houptsyte/Artikel der Woche

De Jürg Daniel Fleischer (* 23. Dezämber 1974 z Wintertuur, Bürger vo Züri) isch en Schwyzer Spraachwüsseschafter und Profässer a de Humboldt-Uniwërsitëët z Berlyn. Voranen isch er 15 Jaar Profässer a der Uniwërsitëët Marburg gsy. Syni Forschigstheeme sind tüütschi Spraachgschicht, tüütschi Dialäktology und Jiddisch.

De Fleischer hät a der Uniwërsitëët Züri Gërmanischtik, Russischi Linguischtik und Allgimäini Spraachwüsseschaft gstudiert. Wäret und nach em Stuudium isch er Assischtänt gsy am Schwyzerischen Idiotikon (glychzytig mit em Guido Seiler, hüt au en Profässer) und am Fonogrammarchyv vo der Uni Züri (glychzytig mit em Thomas Gadmer, hüt Sekretëër vo de Bündner Walservereinigung). Promowiert hät er 2001 bi der Elvira Glaser mit eme dialäktoloogische Theema.

Nach Gaschtuufenthält under anderem z New York a de Columbia University (2002/03) und z Berlin a de Humboldt-Uniwërsitëët (2004–2007) isch er im Jaar 2007 im hessische Marburg Profässer für Spraachgschicht woorde. Dezue anen isch er vo 2010 bis 2022 Mitgliid vom Forschigszäntrum Tüütsche Spraachatlas a dëren Uni gsy. 2022 isch er uf Berlyn, wo-n-er a de Humboldt-Uniwërsitëët en Leerstuel übernaa hät. Sit 2017 isch er au im Voorstand vom Verein, wo s Schwyzerisch Idiotikon usegit. (…de ganz Artikel lèse)