Pius I.

Dr Pius I. (* z Aquileia (?); † 155 (?) z Rom) isch Bischof vu Rom (140/142(?)–155 (?)) gsii.

Im Kanon Muratori wird dr Hermas, dr Autor vum Wärch Dr Hirt vum Hermas, Brueder vum Pius I. gnännt. Wel dr Hermas e Sklav gsii isch wird aagnuu, ass au dr Pius e Sklav gsii sei. Är soll z Aquileia as Suhn vum Rufinus uf d Wält chuu syy. Är heb d Santa Pudenziana böue, no dr Iberliferig di eltscht Chilche vu Rom. Speter wird er as Märtyrer gnännt, aber doderfir git s kai historischi Beleg. Vylmol wird er dr erscht richtig Bischof z Rom gnännt.

Dr Pius het si vor allem mit dr frieje Gnoschtiker usenander gsetzt, vor allem mit em Valentinus, em Cerdon un em Marcion, wun er as Häretiker exkommuniziert ghaa het. Är soll d Bstimmig erloo haa, ass d Oschtere alliwyl an eme Sunntig soll gfyyrt wäre. Di wenige Brief unter sym Name hän si as Felschige rusgstellt. Sy Feschtdag as Hailge isch dr 11. Juli. Sy Name bedytet: dr Frumm (latynisch)

Literatur

• Georg Denzler: PIUS I.. In: Biographisch-Bibliographisches Kirchenlexikon (BBKL). Band 7, Herzberg 1994, ISBN 3-88309-048-4, Sp. 658–659.

Weblink

 Commons: Pius I. – Sammlig vo Multimediadateie

• Ytrag in d Catholic Encyclopedia, Robert Appleton Company, New York 1913 (änglisch)
• Gsamtwärch vu Migne Patrologia Latina mit Inhaltsverzaichnis

Vorgänger Hyginus

Bischof vu Rom Dr Titel Papscht isch anne 384 zum erschte Mol brucht wore. 140/142–155

Nochfolger Anicetus

Dä Artikel basiert uff ere fräie Übersetzig vu dere Version vum Artikel „Pius_I.“ vu de dütsche Wikipedia. E Liste vu de Autore un Versione isch do z finde.