Nikias

Dr Nikias (Νικίας; † 413 v. d. Z. z Sizilie) isch en antike athenische Politiker und General gsi. Er het e groossi Rolle im Peloponnesische Chrieg (431 - 404 v. d. Z.) gspiilt.

Lääbe

Dr Nikias isch dr Soon vom nöiriiche Athener Nikeratos gsi. Er het zwäi Brüeder, dr Eukrates und dr Diognetos, ghaa. Dr Eukrates isch au en athenische General gsi. Dr Historiker Xenofon säit, ass dr Nikias stäiriich gsi sig und häig sis Vermööge brucht, uum sich bi dr Bevölkerig vo Athen beliebt z mache. S Familievermööge isch vo Silbermine im attische Laurion choo. Dört het dr Thraker Sosias für e Nikias mee as 1000 Sklave usbütet. Dr Thukydides und anderi beschriibe dr Nikias as fromm, rächtschaffe und distanziert. Er het zu sällere Grubbe us dr riiche athenische Oberschicht ghöört, wo wie d Aristokrate Sparta in vile Hiisichte bewunderet häi. Im Geegesatz zum Perikles het er dorum en eender moderate Kurs gegenüber de Lakedaimonier understützt und eso mit dr Politik vom Kimon witergmacht. Noch em Dood vom Perikles im Joor 429 v. d. Z. het er zwar si Iifluss chänne vergröössere, het sich aber mit em Kleon as Konkurränt müesse usenandersetze.

Uf em milidäärische Gebiet isch dr Nikias üsserst vorsichtig gsi. Im archidamische Chrieg het er im Joor 427 d Insle Nisaia bsetzt, aber im Joor druf isch en Intervenzioon gege d Insle Melos wider abbroche worde. In dr Schlacht vo Tanagra het er gege dr Böoitisch Bund kämpft und 425 v. d. Z. bi Solygeia isch er gege d Korinther erfolgriich bliibe.

Noch em Dood vom Kleon in dr Schlacht vo Amfipolis 422 v. d. Z. isch dr Nikias ändgültig dr füerend Politiker in Athen worde. Si grössti Läistig isch uf em diplomatische Gebiet gsi: dr Nikiasfriide mit Sparta isch noch iim benennt. Lang het dä Friide nid bestande, under anderem dr Alkibiades, wo us ere alte Familie gstammt het, d Politik vom Nikias bekämpft het.

415 het d Athener Volksversammlig dr Nikias, dr Alkibiades und dr Lamachos zu de Stratege vo dr blaante Sizilieexpedizioon gweelt. Dr Nikias het zwar gege dä Fäldzuug gstimmt, het sich aber wäge dr allgemäine Chriegsöiforii nit gegen e populär Alkibiades chönne duuresetze, wo s Volk zum Chrueg überreedet het. Wo dr Alkibiades gflüchdet und dr Lamachos in dr Schlacht umchoo isch, isch dr Nikias braktisch elläi für die zwäijöörogo Belaagerig vo Syrakus verantwortlig gsi. Denn häi d Syrakuser Hilf vo Sparta überchoo und dr Nikias het z lang zöögeret, zum d Flotte und d Armee no z rette. Noch dr Niiderlaag vo de Athener häi d Syrakuser dr Nikias und dr Fäldheer Demosthenes gfange gno und hiigrichdet. Im Nikias si Brueder Eukrates und si Soon, dr Nikeratos, si z Athen wääred dr Herschaft vo de Drissig Türanne 404 v. d. Z. hiigrichdet worde.

Kwelle

• Thukydides: Der Peloponnesische Krieg. Uusegee vom Helmuth Vretska und Werner Rinner. Reclam, Stuttgart 2000, ISBN 3-15-001808-0.
• Plutarch: Nikias. Dütschi Übersetzig: Große Griechen und Römer. Übersetzt vom Konrat Ziegler. Band 2. dtv, Münche 1979, ISBN 3-7608-3607-0. Änglischi Übersetzig bi LacusCurtius

Litratuur

• Norbert Geske: Nikias und das Volk von Athen im Archidamischen Krieg (= Historia. Einzelschriften, Heft 186). Stuttgart 2005, ISBN 3-515-08566-1.

Weblingg

• Jona Lendering: Artikel. In: Livius.org (änglisch)

Fuessnoote

Dä Artikel basiert uff ere fräie Übersetzig vum Artikel „Nikias“ vu de dütsche Wikipedia. E Liste vu de Autore un Versione isch do z finde.