Nationalsozialismus

Dä Artikel behandlet die nationalsozialistischi Ideologii. Für d Ziit vom Nationalsozialismus lueg do.

Dr Hitler haltet e Reed 1927 bim dritte Riichsbardeidaag vo dr NSDAP, em erste wo z Nürmbärg organisiert worde isch.

Dr Nationalsozialismus isch e rächtsextremi, totalitäri und rassistischi Ideologii gsi, wo noch em Erste Wältchrieg z Dütschland ufcho isch und vor allem im nördlige Europa Ahänger gha het. Die politischi Bewegig, wo die Ideologii in d Wirklichkeit umgsetzt het, die Nationalsozialistischi Dütschi Arbeiterpartei, churz NSdAP, isch vom Adolf Hitler agfüehrt worde und het noch dr Wirtschaftskrise vo 1929 grosse Zuelauf übercho, isch noch de Wahle 1933 die grösst Regierigspartei worde und het mit Gwalt und Hinderlist d Macht ganz an sich grisse und e totalitäri Diktatur errichtet.

Dr Nationalsozialismus het in vile Beziehige die gliiche Eigeschafte wie dr italiänisch Faschismus gha: dr Nationalismus, d Mobilisierig vo de Masse, d Brutalitet vom politische Diskurs, dr Hass uf die politisch Linggi, d Verachtig für ä demokratisch Prozäss und d Verehrig vom Füehrer; aber im Nazismus isch s meiste extremer gsi. Dr Rassismus, wo z Italie erst im Verlauf vo de 1930er Johr sich iibürgeret het, isch vo Afang a ein vo siine wichdigste Bestanddeil gsi. Dr Nationalsozialismus isch antiintellektuell gsi und ohni diefergehendi theoretischi Fundierig und het d Lüt azoge mit stark emotionelle Botschafte und ihne d Hoffnig vermittlet, ass si dr Füehrer us ihrer Misere wurd befreie und ihri Find wurd zerstöre.

Quelle

• Dr Artikel "National Socialism." in dr Encyclopædia Britannica. Ultimate Reference Suite. Chicago: Encyclopædia Britannica, 2009.

Lueg au

Gliichschaltig