Kerstin Andreae

Dialäkt: Undermarkgreflerisch

D Kerstin Andreae (2011)

D Kerstin Andreae (* 21. Oktober 1968 z Schramberg) isch e dytschi Bolitikeri (Bindnis90/Di Griene) un Mitgliid vum dytsche Bundesdag.

Läbe un Beruef

In ihre Juged isch d Andreae im VCP Stamm Königsboten Schramberg im Verband Christlicher Pfadfinderinnen und Pfadfinder aktiv gsii, wu ihre Inträssi an Umwälttheme gweckt woren isch. Nochdem Abitur anne 1988 am Gymnasium Schramberg het d Kerstin Andreae an dr Universitet Fryybeg Bolitischi Wisseschaft un Volkswirtschaftslehr studier, 1996 het si s Studum as Diplom-Volkswirti abgschlosse. Derno het si bi dr Firma mediKUR - Agentur für Gesundheits- und Kurtechnologie z Hamm gschafft. Anne 1998 isch si Prässereferänti un Wahlkampfkoordinatori fir dr Wilfried Telkämper gsii. Derno isch si as Projäktmanageri an s Sozialwisseschaftli Fraueforschigsinschtitut vu dr Evangelische Fachhochschuel Fryybeg gwägslet. Vu 2001 bis 2002 isch si Mitarbaiteri bim Projäktentwickler „Das Grüne Emissionshaus“ gsii.

D Andreae het drei Chinder: dr Mauritz us ihre erschte Eh un d Emma un dr Paul us ihre Eh mit em Volker Ratzmann, em ehmolige Fraktionsvorsitzer vu Bindnis 90/Di Griene im Abgordnetehuus vu Berlin. Ihri Schweschter Susanne Andreae isch Ärzti un medizinischi Fachbuechautori.

Bartei

D Kerstin Andreae isch anne 1990 in d Bartei Di Griene yydrätte. Vu 1991 bis 1993 het si em Landesvorstand vu dr Grien-Alternative Juged Bade-Wirttebärg aaghert. Vu 1992 bis 1999 isch si Mitglid vum Chraisvorstand vu dr Griene z Fryybeg un vu 1999 bis 2001 im Landesvorstand vu dr Griene z Bade-Wirttebärg gsii.

Abgordneti

Vu 1999 bis 2002 het si em Stadtrot vu Fryybeg aaghert.

Syter anne 2002 isch si Mitglid vum Dytsche Bundesdag. Bis Februar 2007 isch si Sprächeri vu dr Bundesdagsfraktion Bindnis 90/Di Griene fir Kommunalbolitik un vu 2005 bis 2007 Obfrau vu dr Griene Fraktion im Finanzuusschuss gsii. Syt Merz 2007 isch d Andreae Fraktionssprächeri fir Wirtschaftsbolitik un Obfrau im Uusschuss fir Wirtschaft un Tächnologi.

D Andreae isch allwyl iber d Landeslischte Bade-Wirttemberg in den Bundesdag yyzoge. Uf em Landesbarteidag im Oktober 2008 isch si zue dr Spitzekandidati gwehlt wore. Derzue isch si as Diräktkandidati im Wahlchrais Fryybeg adrätte.

No dr Bundesdagswahl 2013 het d Andreae fir dr Vorsitz vu dr griene Bundesdagsfraktion kandidiert. In dr Abstimmung am 8. Oktober 2013 isch si 20 vu 61 Stimme dr Katrin Göring-Eckardt unterläge, wu uf 41 Stimme chuu isch un au em Realo-Lager zuegrächnet wird.

Mitgliidschafte

• Stellverdrätt. Byrotsmitglid vu dr Bundesnetzagentur
• Byrotsmitglid vu dr Europäische Akademi fir Fraue in Bolitik un Wirtschaft
• Byrotsmitglid vu dr Evangelische Fachhochschuel Fryybeg
• Byrotsmitglid vu dr Albert-Ludwigs-Universitet Fryybeg
• Mitglid im Kuratorium Aids-Hilfe Freiburg e. V.
• Mitglid im Bürgerverein Oberwiehre-Waldsee e. V.
• Mitglid im Förderverein wohnungsloser Frauen OFF
• Mitglid im Trinationale Atomschutzverband TRAS
• Schirmherri vum Förderverein der KITA des Klinikums Freiburg
• Gotti fir M.O.B.I.L.I.S. - SportMed. Schulungsprogramm Adipositas
• Schirmherri vu SCOLAIRE am Dt.-franz. Gymnasium Fryybeg

Weblink

• Websyte vu dr Kerstin Andreae
• Biographie beim Deutschen Bundestag
• Läbeslauf bi dr Bundesdagsfraktion Bindnis 90/Di Griene
• Grieni Wirtschaftsbolitik
• Kerstin Andreae uf abgeordnetenwatch.de

Dä Artikel basiert uff ere fräie Übersetzig vum Artikel „Kerstin_Andreae“ vu de dütsche Wikipedia. E Liste vu de Autore un Versione isch do z finde.