Jens Böhrnsen
Dr Jens Böhrnsen (* 12. Juni 1949 z Bremen) isch e dytsche Bolitiker (SPD). Vu 2005 bis 2015 isch er Bresidänt vum Senat un Burgermaischter vu dr Freie Hansestadt Bremen un Senator fir chilchligi Aaglägehaite gsii, vu 2005 bis 2007 au Senator fir Juschtiz un Verfassig un vu 2007 bis 2015 Senator fir Kultur.
Lääbe
[ändere | Quälltäxt bearbeite]Dr Böhrnsen isch im Bremer Stadtdail Gröpelingen uf Wält chuu. Sy Vater Gustav Böhrnsen, as KPD-Mitglid im Widerstand gege dr Nationalsozialismus engaschiert, isch iber zwai Johrzenht Bedriibsrotsvorsitzer vu dr Großwerft AG Weser un fir ai Legislaturperiod SPD-Fraktionsschef in dr Burgerschaft gsii.
Noch em Abitur 1968 am Gymnasium am Waller Ring im Stadtdail Walle het dr Böhrnsen vu 1968 bis 1973 Rächtswisseschaft an dr Universitet Kiel studiert. Anne 1973 het er s erscht juristisch Staatsexame z Schleswig-Holstein abglait, 1977 s zwait z Hamburg un un isch derno Assessor in dr bremische Verwaltig wore. Vu 1978 bis 1995 isch er Richter am Verwaltigsgricht Bremen gsii, bis 1980 uf Prob un 1991 bis 1995 as Vorsitzer vu dr 6. Chammere.[1]
Dr Böhrnsen isch Vater vu zwee Sihn us erschte Eh. Sy zwooti Frau Luise Morgenthal isch am 7. Merz 2007 im Alter vu 58 Johr an dr Folg vun ere Hirnbluetig sgtorbe. Syt Dezämber 2011 isch dr Böhrnsen mit dr Schullaiteri Birgit Rüst ghyrote.[2]
Bolitik
[ändere | Quälltäxt bearbeite]
Dr Böhrnsen isch anne 1967 mit 18 Johr in d SPD yydrätte. Syt em 8. Juni 1995 hockt er fir d SPD-Fraktion in dr Bremische Burgerschaft un isch 1999 Fraktionsvorsitzer.
In ere Mitgliderbefrogig vu dr Bremer SPD isch er 15. Oktober 2005 zum Noofolger vum Henning Scherf as Bresidänt vum Senat un Burgermaischter vu dr Freie Hansestadt Bremen nominiert wore (72 % bzw. 1.924 Stimme fir dr Böhrnsen, 27 % bzw. 721 Stimmen fir dr Willi Lemke).[3] Am 8. Novämber 2005 isch dr Böhrnsen mit 62 Stimme zum Bresidänt vum Senat un Burgermaischter vu dr Freie Hansestadt Bremen gwehlt wore. Bis zum Änd vu dr Legislaturperiod het er di Groß Koalition wytergfiert, het si aber im Wahlkampf 2007 fir e Koalition mit dr Grienen uusgsproche.[4] Bi dr Wahl am 13. Mai 2007 het d SPD 36,8 % vu dr Stimmen iberchuu un isch derno ne Koalition mit dr Grienen yygange. Am 29. Juni 2007 isch dr Böhrnsen mit 47 Stimmen as Bresidänt vum Senat un Burgermaischter im Amt bstetigt wore.
Vu Merz 2006 bis 2015 isch dr Böhrnsen Vorsitzer vum Vermittligsuusschuss zwische Bundesdag un Bundesrot un stellverdrättende Vorsitzer vu dr Federalismuskommission II (2007–2009) gsii.[5]
Vum 1. Novämber 2009 bis 31. Oktober 2010 isch dr Böhrnsen turnusgmäß Bresidänt vum Bundesort gsii. Noch em Ruggdritt vum Horst Köhler vum Amt vum Bundesbresidänt am 31. Mai 2010 het dr Jens Böhrnsen in däre Funktion no Art. 57 Grundgsetz zytwys bis zum Amtsaadritt vum neie Bundesbresidänt Christian Wulff no syre Wahl am 30. Juni 2010 d Amtsgschäft vum Bundesbresidänt ibernuu.[6] Vum 1. Novämber 2010 bis zum 31. Oktober 2011 isch dr Böhrnsen erschte Vizebresidänt vum Bundesrot gsii.
Bi dr Burgerschaftswahl am 22. Mai 2011 hän d SPD un di Griene Stimme derzue gwunne. Am 30. Juni 2011 isch dr Böhrnsen vu dr Bremische Burgerschaft in sym Amt as Burgermaischter mit 57 vu 83 Stimme bstetigt wore.[7]
Noch em schlöchte Abschnyyde vu dr SPD bi dr Burgerschaftswahl am 10. Mai 2015 het dr Böhrnsen am Dag no dr Wahl verchindet, ass er nimi as Regierigsschef aadritt. Mit dr Wahl vu sym NooFolger Carsten Sieling am 15. Juli 2015 isch er us em Amt gschide.
Sunschtigs Engaschmänt
[ändere | Quälltäxt bearbeite]Dr Böhrnsen isch Mitglid vu ver.di, vu dr Arbeiterwohlfahrt, dr Dytsch-Israelische Gsellschaft un dr Bremische Evangelische Chilche.[1] Är isch Vorsitzer vum Stiftigsrot vu dr Stiftig Wohnliche Stadt.[8]
Weblink
[ändere | Quälltäxt bearbeite]
Commons: Jens Böhrnsen – Sammlig vo Multimediadateie- Bürgermeister Jens Böhrnsen uf dr Websyte vum Senat vu dr Freie Hansestadt Bremen
- David Böcking: Bremer Schuldendesaster: „Wir sind auf den Knochen angelangt“. Gspräch mit em Jens Böhrnsen. In: Der Spiegel, 25. Juli 2011.
Fueßnote
[ändere | Quälltäxt bearbeite]- ↑ 1,0 1,1 Lebenslauf von Bürgermeister Jens Böhrnsen. In: Jens-Boehrnsen.de.
- ↑ Birgit Bruns: Private Zeremonie in Bremen-Vegesack. Böhrnsens heimliche Hochzeit. In: Weser-Kurier.de, 7. Jänner 2012; Köpfe der Wirtschaft: Jens Böhrnsen. (Site cha nüme abgrüeft wärde; Suche im Webarchiv) In: Wirtschaftswoche. Abgruefen am 23. Mai 2011.
- ↑ Michael Scherer: Kommunalpolitik in Bremen. In: Andreas Kost, Hans-Georg Wehling (Hrsg.): Kommunalpolitik in den deutschen Ländern. Eine Einführung. 2., aktualisierte und überarbeitete Auflage. VS Verlag, Wiesbaden 2010, S. 120–147].
- ↑ Jörn Ketelhut, Roland Lhotta, Mario-Gino Harms: Die Bremische Bürgerschaft als „Mitregent“. Hybrider Parlamentarismus im Zwei-Städte-Staat. In: Siegfried Mielke, Werner Reutter (Hrsg.): Landesparlamentarismus: Geschichte – Struktur – Funktionen. 2., durchgesehene und aktualisierte Auflage. VS Verlag für Sozialwissenschaften, Wiesbaden 2012, S. 219–252].
- ↑ Bürgermeister Jens Böhrnsen (SPD). (Memento vom 23. Septämber 2015 im Internet Archive) In: Bremen.de.
- ↑ Böhrnsen übernimmt Köhlers Amtsgeschäfte. In: Spiegel Online, 31. Mai 2010.
- ↑ Bürgermeister Böhrnsen wiedergewählt. In: Focus, abgruefen am 30. Juni 2011.
- ↑ Organe der Stiftung. Stiftungsrat. Archivlink (Memento vom 14. Dezämber 2015 im Internet Archive) In: WohnlicheStadt-Bremen.de, Stand 1. September 2011.
|
Dä Artikel basiert uff ere fräie Übersetzig vu dere Version vum Artikel „Jens_Böhrnsen“ vu de dütsche Wikipedia. E Liste vu de Autore un Versione isch do z finde. |