Gastroenteritis

As Gastroenteritis (griechisch, wörtlig: Maage-Darm-Entzündig – in dr Umgangssprooch Maage-Darm-Grippe, Brächdurchfall oder Buuch-Grippe) – wird ganz allgemäin en Entzündig im Maage-Darm-Drakt bezäichnet. Bi dr Maage-Darm-Grippe chotzt mä vilmol und het Durchfall, aber d Chranket het mit dr „ächte Grippe“ (Influenza) nüt z due. E Gastroenteritis cha verschidnigi Ursache haa. Behandlet wird si mäistens nume mit Massnaame, wo d Sümptom abschweche.

Epidemiologii

Gastroenteritide oder Maagen-Darm-Entzündigunge si dr hüfigst Grund für Durchfall und Läidsii bi Chinder und Erwaggsene. No 1980 häi Durchfallchrankhäite öbbe 4,6 Millione Todesfäll im Joor verursacht und si die ersti Ursach für d Chinderstärbligkäit gsi. Sit dass mä 1979 die sogenannti orali Rehydratazionstherapii as standardisierti Behandlig iigfüert het, isch die Zaal uf öbbe 1,5 Millione im Joor 2000 gsänkt worde.^[1]

Ursache

Es git e Hufe verschidnigi Ursache für d Maage-Darm-Grippe. Si gönge vo Infekzione über Vergiftige bis zu füsikalische Ursache. In de mäiste Fäll si Bakterie oder Wiire verantwortlig für e Maage-Darm-Grippe. Si schädige d Schliimhute vom Verdaujigssüsteem äntwäder diräkt oder indiräkt dur Bakteriegift. D Maage-Darm-Grippe wird uf em fekal-orale Wääg überdräit (fekal-orali Schmiirinfekzion). D Schliimhüt chönne au dur ionisierendi Straalig, wie Rönggestraale oder radioaktivi Straalig, gschädigt wärde.

Tüpischi Erreeger von ere infektiöse Gastroenteritis
Norowiire im elektronemikroskopische Bild
Salmonella typhimurium in dr Gramfärbig 1000-mol vergröösseret
Giardia lamblia im elektronemikroskopische Bild

Therapii

Wil mä gege d Ursache sälber mäistens nüt cha mache, beschränkt sich d Therapii im Allgemäine uf symptomatischi Maassnaame. Die bestöön in erster Linie din, ass mä ersetzt, was an Flüssigkäit und Salz bim Chotze und Durchfall verlore goot. Am Beste isch s, wemm män em Paziänt e standardisierti Löösig mit eme Druubezucker-Salz-Gmisch (WHO-Rehydratazionslöösig) git. Wenn das nid längt für zum d Flüssigkäit ersetze („Rehydratation“), muess mä vor allem bi Chinder, wo d Gfoor ass si wurde usdröchne bsundrigs gross isch, en Infusion aasetze.

Fuessnoote

↑ C. G. Victora u. a.: Reducing deaths from diarrhoea through oral rehydration therapy. In: Bulletin of The World Health Organization. 2000, 78, S. 1246–1255 PMID 11100619.

Bitte tue de Hiwiis zu Gsundheitsthemene biachte!

Dä Artikel basiert uff ere fräie Übersetzig vum Artikel „Gastroenteritis“ vu de dütsche Wikipedia. E Liste vu de Autore un Versione isch do z finde.

[victora.-1] C. G. Victora u. a.: Reducing deaths from diarrhoea through oral rehydration therapy. In: Bulletin of The World Health Organization. 2000, 78, S. 1246–1255 PMID 11100619.

[1]