S biologische Gschlächt

Mit em Begriff vom biologische Gschlächt oder somatische Gschlächt bezäichnet mä s Gschlächt, wo en Indiwiduum us biologischer Sicht het.

Bim Mensch

S chromosomale Gschlächt

Es bestöön meereri Stuefe in dr Definizion vom körperlige Gschlächt. Am Aafang wird bi dr Befruchdig s chromosomale Gschlächt festgläit. Es git zwäi underschidligi Gschlächtschromosome, s X-Chromosom und s Y-Chromosom. Im Normalfall het s in ere befruchdete Zälle zwäi Gschlächtschromosome, wenn en Y-Chromosom vorhande isch, goot d Entwigglig in dr männlige Richdig, sust in die wiibligi, d. h. wenn bäidi Gschlächtschromosome X-Chromosome si, denn het dr Embryo e wiibligs Chromosom, wenn s en X-Chromosom und e Y-Chromosom het, denn isch er männlig. Es git s aber au, ass en Embryo nume en X-Chromosom het, oder zwäi X und äi Y Chromosom. Wenn s mee as äi X-Chromosom het, wärde alli X-Chromosom usser äim inaktiwiert, und en XXY-Embryo zum Bischbil entwigglet sich männlig.

S gonadale Gschlächt

D Entwigglig vo de Gonade bim Embryo isch bi bäide Gschlächter zerst emol gliich. Denn wird in dr sibte Wuche die sogenannti sex-determining region of Y (SRY) aktiv und macht dur e Hoode-determinierend Faktor (TDF) us de Urkäimdrüese Hoode. Wenn dr TDF feelt, entstöön Äierstöck.

S genitale Gschlächt

Die differenzierte Käimdrüese vom Embryo sondere denn Gschlächtshormon ab, wo d Entwigglig vo de übrige Gschlächtsorgan stüüre.

D Gschlächtsidentidäät

Schematischi Daarstellig vom ene Maa mit em Klinefeltersündrom, wo vo zwäi oder mee X-Chromosome verursacht wird.

In de mäiste Fäll isch s biologische Gschlächt, wo sich eso entwigglet het, au s Gschlächt, wo sich dr Mensch mit em identifiziert. Aber es isch nid allzu sälte, ass uf äinere vo de Stuefe s Gschlächt sich nid äidütig entwigglet. D Folge chönne si, ass sich d Gschlächtsorgan und d Gschlächtsmerkmol nid eso entwiggle, wie mä s wurd erwarte: d Gschlächtsorgan chönne verkümmeret si, si funkzioniere nid richdig, es chönne Gschlächtsorgan vo bäide Gschlächter im gliiche Körper vorcho, u.s.w. In sonige Fäll, aber au denn, wenn s körperlige Gschlächt zwar äidütig isch, dr Mensch sich aber im »falsche Körper« füült wie das bi Dranssexuelle bassiert, isch d Gschlächtsidentidäät nit idäntisch mit em biologische Gschlächt.