U Thant

	U Thant; သန့်
	; U Thant in 1963
	3de Sekretaris-generaal van die Verenigde Nasies
	Ampstermyn; 30 November 1961 – 31 Desember 1971
Voorafgegaan deur	Dag Hammarskjöld
Opgevolg deur	Kurt Waldheim
Persoonlike besonderhede
Gebore	22 Januarie 1909 ; Pantanaw, Brits-Birma, Brits-Indië (nou Pantanaw, Mianmar)
Sterf	25 November 1974 (op 65); New York Stad, Verenigde State
Eggenoot/-note	Daw Thein Tin (oorlede in 1989)
Kind(ers)	Maung Bo, Tin Maung Thant, Aye Aye Thant
Religie	Theravada-Boeddhisme
Handtekening

U Thant (Birmaans: သန့်; [θa̰ɴ]; 1909–1974) was 'n Birmaanse diplomaat. Hy was van 1961 tot 1971 die derde sekretaris-generaal van die Verenigde Nasies.

Lewensloop

U Thant is op 22 Januarie 1909 in Pantanaw, Birma (nou Mianmar) gebore. Hy is aan die National High School in Pantanaw en die University College in Rangoen (tans Yangon) opgelei. Voor sy funksie as sekretaris-generaal was hy 'n diplomaat, onderwyser en vryskutjoernalis.

Ná die destydse sekretaris-generaal, Dag Hammarskjöld, se dood in 'n vliegongeluk, is U Thant op 30 November 1961 tot die amp verkies. Beide die Verenigde State en die Sowjetunie was ontevrede met Hammarskjöld se onafhanklike optrede, en het U Thant se verkiesing as 'n bewuste keuse vir 'n swakker sekretaris-generaal gesien.

In sy tyd word die posisie van die VN in die internasionale politiek toenemend gemarginaliseer. U Thant gee toe aan Egipte se versoek om VN-troepe (wat 'n buffer tussen Egipte en Israel gevorm het) terug te trek. As gevolg hiervan val die Egiptiese leër Sinai in. Dit het die VN se geloofwaardigheid ernstig aangetas. Die VN het ook nouliks 'n rol in die eskalerende konflik in Indo-China gespeel.

Hy is op 25 November 1974 in New York Stad aan longkanker oorlede. Sy liggaam is na Rangoen teruggevlieg, waar dit sonder seremonie of eerbetoon begrawe sou word. Duisende daag egter by sy begrafnis op, en studente kaap sy kis voordat hy ter ruste gelê kon word. Die studente het hom toe op die voormalige terrein van die Rangoon Universiteit se Studente Unie, wat in 1962 deur die land se president met dinamiet opgeblaas is, ter ruste gelê en 'n mausoleum vir hom gebou. Soldate bestorm die betogende studente op 11 Desember en neem die kis terug, waarna dit aan die voet van die Shwedagon Pagoda-tempel begrawe is.

Eksterne skakels

Wikimedia Commons het meer media in die kategorie U Thant.