U.S. Route 66

U.S. Route 66

Verenigde State

Amptelike ingebruikneming

11 November 1926

Lengte

2448 myl
3940 km

Kaart

Deelstate

Illinois, Missouri, Kansas, Oklahoma, Texas, Nieu-Meksiko, Arizona, Kalifornië

U.S. Route 66 of U.S. Highway 66, ook bekend as die Will Rogers Highway, die Main Street of America of die Mother Road, was een van die oorspronklike grootpaaie of highways wat as deel van die U.S. Highway System ontstaan het. U.S. Route 66 is amptelik op 11 November 1926 in diens geneem, terwyl die eerste straatborde langs die grootpad in die volgende jaar opgerig is.

Route 66, wat een van die mees befaamde grootpaaie in die Verenigde State sou word, het oorspronklik oor 'n lengte van 2 448 myl (3 940 km) vanaf Chicago in Illinois deur die deelstate Missouri, Kansas, Oklahoma, Texas, Nieu-Meksiko en Arizona geloop en aan die Amerikaanse Weskus in Kalifornië geëindig. Sy westelike eindpunt was in Santa Monica in Los Angeles County.

US 66 was een van die hoofroetes vir grootskaalse weswaartse migrasiegolwe wat tot ingrypende sosiale en ekonomiese transformasieprosesse in Kalifornië sou lei soos die vlug van duisende boeregesinne uit die droogtegeteisterde Dust Bowl-gebiede van die Middelweste gedurende die Groot Depressie van die 1930's. Hierdie vlug van sowat 200 000 mense, na wie as Okies verwys is, staan sentraal in John Steinbeck se roman The Grapes of Wrath.

Gedurende die Tweede Wêreldoorlog het nuwe migrasiestrome langs die grootpad na die Weskus beweeg op soek na werksgeleenthede in die florerende wapenbedryf van Suid-Kalifornië. Ekonomiese welvaart, 'n aangename klimaat en 'n ontspanne voorstedelike leefstyl was trekpleisters wat ook ná die oorlog nuwe aankomelinge na Kalifornië laat stroom het. Gedurende sy laaste jare was Route 66 'n droompad vir motortoeriste.

Binnelandse migrasiestrome het die ekonomie van gemeenskappe langs die grootpad laat opbloei, en dit was juis die bewoners van nedersettings langs US 66 wat protes aangeteken het toe die bou van 'n nuwe hoofpadstelsel tussen die Amerikaanse deelstate, die Interstate Highway System, die grootpad se lewensvatbaarheid bedreig het. Ondanks alle proteste is U.S. Route 66 as amptelike grootpad en benaming op 26 Junie 1985 deur die American Association of State Highway and Transportation Officials (AASHTO) geskrap.

Liedjie

In 1946 skryf Bobby Troup en sy vrou Cynthia die liedjie "Get Your Kicks on Route 66". Dit het later een van Nat King Cole se grootste trefffers geword.

"Well, if you ever plan to motor west,
travel my way: take the highway that's the best,
Get your kicks on Route Sixty-Six.
Well, it winds form Chicago to L.A.
More than two thousand miles all the way.
Get your kicks on Route Sixty-Six."

Eksterne skakels

Amptelike webtuiste

National Park Service (NPS): Route 66

Kaarte

NPS: Aflaaibare en drukbare kaart van Route 66

Geskiedenis

National Historic Route 66 Federation: The History of Route 66 Geargiveer 12 Junie 2020 op Wayback Machine

Liedjie

https://www.youtube.com/watch?v=11TyAd2fkho