Turkse van
| Turkse van | ||||
| ||||
| ’n Turkse van met ’n skilpaddoppatroon. | ||||
| Alternatiewe naam | Turkse kat Armeense kat | |||
| Land | Turkye | |||
| Ontstaan | Natuurlik | |||
| Pels | Halflank | |||
| Patroon | Van | |||
| Wetenskaplike naam | ||||
| Felis catus (huiskat) | ||||
| ||||
Die Turkse van (Turks: Van kedisi) is ’n katras met halflang hare wat, anders as ander huiskatte, lief is vir water en swem.
Geskiedenis
[wysig | wysig bron]Die ras is buite Turkye ontwikkel uit ’n hoofsaaklik wit natuurlike ras, die vankat wat voorkom in die Vanmeer-gebied in Suidoos-Turkye (voorheen deel van Armenië). Dit is aanvanklik in die Weste die Turkse kat genoem,[1] maar die naam is verander om dit te onderskei van die Turkse angora, wat sy oorsprong in die Ankara-streek (voorheen Angora) het. Dit word ook soms die Armeense kat genoem. Sommige verenigings, soos The International Cat Association (TICA), beskou die Turkse van en Turkse angora as een ras.
Beskrywing
[wysig | wysig bron]
.jpg)
Die kat het tradisioneel ’n krytwit lyf met rooi aan die stert en kop – die "van-patroon" – met blou, amberkleurige of ’n onpaar oë (een blou en een amberkleurig). Ander pelskleure wat deesdae erken word, is room, swart, blou, gestreep, skilpaddop en verskeie kombinasies daarvan. Die kleur mag net aan die stert en kop voorkom. Lukrake vlekke mag aan die lyf voorkom, maar die hele kleurgedeelte mag nie meer as 20% van die lyf wees nie en geen merke mag aan die bene voorkom nie. Die res van die lyf is krytwit.
In Turkye word tans net die effekleurige wit kat met kort of lang hare erken.
Die pels is baie besonders. Die groot verskille in die winter- en somertemperatuur in die bergagtige Oos-Anatolië het waarskynlik die eienskappe daarvan beïnvloed. Die Vanmeer-gebied is 1 600 m bo seespieël en het uiterste temperature. Die kat se halflang, waterbestande pels is dik en sag in die winter. In die lente en somer verhaar die kat en bly ’n korter, ewe sagte pels agter. Die hare aan die stert bly dwarsdeur die jaar lank en wollerig. Hul hare is minder allergenies as die meeste ander katte s’n.
Die kat is groot, die skouers breed en die lyf taamlik lank, en die agterpote is effens langer as die voorpote. Die agterlyf moenie breër as die skouers wees nie. Die Turkse van is intelligent, spelerig en liefdevol. Anders as ander katte is hulle lief vir water en om te swem.
Sien ook
[wysig | wysig bron]Verwysings
[wysig | wysig bron]- ↑ Rex, Abyssinian and Turkish Cats, deur Alison Ashford en Grace Pond, ISBN 0-668-03356-8
Eksterne skakels
[wysig | wysig bron]- Suider-Afrikaanse standaarde Geargiveer 6 Maart 2016 op Wayback Machine
- Cat Fanciers' Association se teelprofiel
- TICA-artikel oor die Turkse van Geargiveer 28 Julie 2011 op Wayback Machine
- Yahoo-besprekingsgroep Geargiveer 30 September 2011 op Wayback Machine
Wikimedia Commons het meer media in die kategorie Turkse van.
Hierdie artikel is vertaal uit die Engelse Wikipedia
