The Witness
The Witness (vroeër die Natal Witness) is een van die oudste bestaande koerante in Suid-Afrika en het op 27 Februarie 1846, minder as 'n jaar ná die oudste koerant wat tans daagliks uitgegee word, The Herald, die eerste keer in Pietermaritzburg die lig gesien. Die eerste uitgewer van die koerant was David D. Buchanan.
The Witness verskyn sedert Januarie 1881 daagliks, kort ná die Cape Times (1876) en Daily News (1878), destyds die Natal Mercantile News.
Oorname deur Naspers
[wysig | wysig bron]Naspers het in 2000 'n 50%-aandeel in die uitgereikte kapitaal van die Natal Witness van die Craib-familie gekoop wat die koerant al van 1942 af beheer het. In Julie 2010 het Media24 'n ooreenkoms onderteken om ook die oorblywende 50% van The Natal Witness Printing and Publishing Company, die beheermaatskappy van die Witness, te bekom.[1]
Die filiaal druk en versprei 'n hele aantal koerante. Dit sluit, buiten die Witness self, titels soos Echo, The Mirror, Village Talk en Greytown Gazette in. UmAfrika was 'n weeklikse halfblad Zoeloe-koerant wat die laaste maal op Vrydag 7 Junie 2013 verskyn het.[2]
Werksaamhede
[wysig | wysig bron]The Witness verskyn van Maandag tot Vrydag. Weekend Witness verskyn Saterdae en word oral deur die provinsie versprei, insluitend Durban en langs die kus. Weekend Witness beloop 36 tot 48 breë blaaie en sluit in nuus, kommentaar, sport, persoonlike geldsake, vermaak en eiendom.
Die filiaal wat The Witnes druk, bestuur en versprei ook Suid-Afrika se oudste swart koerant, Ilanga, wat met gemiddelde verkope van 107 102 (tweede kwartaal 2013) elke Maandag en Donderdag die naasgrootste koerant in KwaZulu-Natal is. Ilanga word in Zoeloe gedruk en dwarsdeur die provinsie asook in Gauteng versprei en het 'n leserstal van meer as 500 000.
Die Gautengse Daily Sun word nou ook deur The Witness in KwaZulu-Natal gedruk en versprei.
The Witness se sirkulasie het met byna 17% sedert die vroeë jare tagtig tot 'n hoogtepunt van 24 500 toegeneem, maar in die tweede kwartaal van 2013 teruggesak tot 17 908, vergeleke met 19 275 in die ooreenstemmende tydperk in 2012.
Sien ook
[wysig | wysig bron]Bronne
[wysig | wysig bron]- Rosenthal, Eric, Encyclopaedia of Southern Africa, Juta and Company Limited, Kaapstad, 1978.
- Media24 se inligting oor The Witness[dooie skakel]
Verwysings
[wysig | wysig bron]- ↑ Competition commission to probe media[dooie skakel], City Press, 1 Augustus 2011. URL besoek op 2 Julie 2013.
- ↑ TheMedia.co.za UmAfrika publishes last newspaper… for now. URL besoek op 2 Julie 2013.
Eksterne skakels
[wysig | wysig bron]- Die koerant se webwerf
- Witness begin 'n Durbanse uitgawe. URL besoek op 3 September 2013.