Solvang

City of Solvang
Bynaam: The Danish Capital of America
Ligging van Solvang in Kalifornië Ligging van Solvang in Kalifornië
Ligging van Kalifornië in die VSA
Land	Verenigde State van Amerika
Deelstaat	Kalifornië
County	Santa Barbara
Regering
- Burgemeester	Ryan Toussaint
Oppervlakte
- Totaal	6,4 km² (2,5 myl²)
Bevolking (2009)
- Totaal	5 173
- Digtheid	833,1/km² (2 157,7/myl²)
Areakode(s)	805
Webwerf: solvang.com

Solvang (Deens: "sonnige veld") is 'n stad in Santa Barbara County, Kalifornië, Verenigde State, 132 myl noord van Los Angeles. Dit is een van die nedersettings in Santa Ynez Valley met 'n bevolking van 5 173 in 2009. Solvang is op 1 Mei 1985 as stad geïnkorporeer.

Deense vakwerkboukuns op Tivoli Square

Solvang is in 1911 deur drie Deens-Amerikaanse opvoedkundiges op die Rancho San Carlos de Jonata op byna 9 000 akkers (3 600 hektaar) se grond gestig. Die eerste setlaars was Deens-Amerikaners wat weswaarts getrek het om 'n Deense kolonie ver weg van die strawwe winters in die Amerikaanse Midweste te stig. Die boustyl van talle fasades en geboue weerspieël dan ook die argitektoniese tradisies van Denemarke. 'n Aantal bakkerye, restourante en winkels roep die smaak van Deense kookkuns na vore en gee 'n indruk van dié land se ontwerpkuns. So is die historiese Santa Ynez Valley-bankgebou, wat in 1919 deur Deense immigrante opgerig is, in 'n winkelsentrum vir Deense ontwerpkuns en leefstylprodukte omgeskep, The Copenhagen House. Deense ondernemings, wat met Nordiese ontwerpkuns verbind word, soos Bering Time, 'n vervaardiger van horlosies en juweliersware, het eie konsepwinkels in Solvang geopen of maak gebruik van die bestaande kleinhandel-infrastruktuur.

Besienswaardighede in Solvang, wat dikwels die "Deense hoofstad van die VSA" genoem word, sluit 'n kopie van die bekende "Klein Meermin"-standbeeld in Kopenhagen, 'n borsbeeld van die Deense digter Hans Christian Andersen en 'n namaaksel van Kopenhagen se Rundetårn ("Ronde toring") op die skaal 1:3 in wat in 1991 in die middestad opgerig is.

Mission Santa Ines, een van Kalifornië se historiese sendingstasies, is eweneens naby die stadsentrum geleë. Michael Jackson se Neverland Ranch is 'n verdere trekpleister naby Solvang.