Pieter du Toit (predikant)

Ds. Pieter du Toit, leraar van NG gemeente Drieankerbaai van 1967 tot 1989.

Ds. Pieter (Piet) du Toit (5 Augustus 1921 – 21 Julie 1989) was 'n predikant van die Nederduitse Gereformeerde Kerk, waarvan die laaste 22 jaar tot en met sy dood as leraar van die NG gemeente Drieankerbaai.

Hy was die seun van dr. Piet du Toit, jare lank sekretaris van die NG Kerk se Sinodale Kommissie van Diens van Barmhartigheid in Kaapstad.

As skoolseun het hy Transvaal op die atletiekbaan verteenwoordig en ook vir Maties se eerste span rugby en krieket gespeel. Hy is in 1947 gelegitimeer waarna hy agtereenvolgens die volgende gemeentes bedien het: Heidelberg (Gauteng), Vereeniging, Heidelberg (Wes-Kaap) en van 15 April 1967 Drieankerbaai, Kaapstad.

Du Toit was gelief en gewild in die gemeente asook in die gemeenskap. In sy begrafnisrede het dr. Frits Gaum gesê Du Toit was 'n atleet by wie van moed opgee nie sprake was nie. Volgens sy eggenote, Zenobia, was hy 'n blymoedige mens wat elke dag voluit gelewe het.

'n Roudiens is in Drieankerbaai gehou en die teraardebestelling was op Gordonsbaai.

Bron

• Gaum, Frits (red.). 1989. Jaarboek van die Nederduitse Gereformeerde Kerke 1990. Pretoria: Tydskriftemaatskappy van die Nederduitse Gereformeerde Kerk.