Palamedes
Palamedes (Grieks: Παλαμήδης) is in die Griekse mitologie die seun van die seeheld Nauplius en ’n prinses van Kreta, Klumene.[1] Hy het in die Trojaanse Oorlog aan die kant van die Grieke teen Troje geveg.[1]
Ekspedisie teen Troje
[wysig | wysig bron]Nadat Paris vir Helena na Troje geneem het, het Agamemnon Palamedes na Itaka gestuur om Odusseus te gaan haal, omdat hy een van dié was wat belowe het om Helena en Menelaos se huwelik te verdedig. Odusseus wou nie die eed nakom nie en het sy lande geploeg met ’n donkie en ’n os voor dieselfde ploeg, wat veroorsaak het dat die ploeg woes heen en weer geruk het omdat die diere nie ewe groot was nie. Palamedes het vermoed wat aan die gang was en het Odusseus se babaseun Telemachos voor die ploeg geplaas. Odusseus het ophou ploeg en gewys hy is by sy volle sinne.[2]
Dood
[wysig | wysig bron]Antieke bronne verskil oor die omstandighede om Palamedes se dood. [1]
Odusseus het Palamedes nooit vergewe dat hy sy seun se lewe in gevaar gestel en hom gedwing het om aan die oorlog deel te neem nie. Toe Palamedes die Grieke aanraai om terug te keer huis toe, het Odusseus goud in sy tent weggesteek en ’n vals brief geskryf wat lyk of dit van koning Priamos van Troje af kom. Die brief en goud is in die tent ontdek en die Grieke het hom daarvan beskuldig dat hy ’n verraaier is.[3] Odusseus en Diomedes het Palamedes toe gestenig. Volgens ’n ander weergawe het die twee vegters hom tydens ’n hengeluitstappie verdrink.[4] Nog ’n weergawe lui dat hy na ’n put gelok is op soek na ’n skat en dat klippe hom doodgeval het. Hoewel Palamedes ’n belangrike karakter in sommige weergawes van die Trojaanse Oorlog is, word hy glad nie in Homeros se Ilias genoem nie.
Ovidius bespreek Palamedes se rol in die Trojaanse Oorlog in die Metamorfoses.[5] Palamedes se lot word beskryf in Vergilius se Eneïde.[6] In Plato se Apologie sê hy dat Sokrates daarna uitsien om in die hiernamaals met Palamedes te praat.[7] Euripides en baie ander dramaturge het werke oor sy lot geskryf.
Hyginus vertel ook ’n verhaal waarvolgens Palamedes 11 letters van die Griekse alfabet geskep het.[8]
Verwysings
[wysig | wysig bron]- ↑ 1,0 1,1 1,2 L Schmitz (1873). A Dictionary of Greek and Roman Biography and Mythology, Volume 3. J. Murray, 1873. Besoek op 13 April 2015.
- ↑ Apollodoros, Epitome, Apollod. Epit. E.3.7
- ↑ Hyginus, Fabulae, 105
- ↑ Pausanias 10.31.2, aangehaal uit die epos Kupria.
- ↑ Ovidius. Metamorfoses. pp. 13.34–60, 308–312.
- ↑ Virgil. Aeneid. pp. 2.81–85.
- ↑ Plato. Apologie, 41b.
- ↑ Hyginus. Fabulae, 277.
Skakels
[wysig | wysig bron]- Palamedes by "Greek Mythology Link"
Wikimedia Commons het meer media in die kategorie Palamedes.
Hierdie artikel is in sy geheel of gedeeltelik uit die Engelse Wikipedia vertaal.
Normdata  |
|
|---|