Mahem
| Mahem | |
|---|---|
| |
| Wetenskaplike klassifikasie | |
| Domein: | |
| Koninkryk: | |
| Filum: | |
| Klas: | |
| Orde: | |
| Familie: | |
| Genus: | |
| Spesie: | B. regulorum
|
| Binomiale naam | |
| Balearica regulorum | |
Die mahem (Balearica regulorum) is 'n redelik algemene standvoël. Hierdie spesie is die enigste kraanvoëls wat in bome kan broei, want hulle kan met die agterste toon om takke vasklou. Om hierdie rede, en 'n paar ander, word geglo dat hierdie relatiewe klein Balearica-kraanvoël die verteenwoordigers is van hulle Gruidae-voorouers.
Identifikasie
[wysig | wysig bron]Die mahem is 116 cm hoog en weeg 3,5 kg. Die lyfvere is hoofsaaklik grys. Die vlerke is ook oorwegend wit, maar bevat ook vere met 'n verskeidenheid kleure. Die kop het 'n kroon van stywe goudkleurige vere. Die wange is wit en dit het 'n helderrooi opblaasbare keelsak. Die bek is relatief kort en die bene swart. Die geslagte lyk eenders, hoewel sommige mannetjies effens groter as ander is. Jonges lyk bruiner en hul kuiwe en lelle is swakker ontwikkel.
Die mahem se hofmakery in die broeiseisoen bestaan uit danse, spronge en 'n gebuig, terwyl hy die rooi keelsak opblaas en 'n harde geroep laat hoor. Dit maak ook 'n geluid wat baie verskil van die trompetter van ander kraanvoëlspesies.
Habitat
[wysig | wysig bron]
Hulle hou in swerms op grasveld, landerye en naby vleie en soortgelyke gebiede in hoogliggende streke asook langs die kus. Hul oornag op eilande langs die kus, in rietplate by riviermondings en in bome. Swerf rond wanneer hulle nie nes maak nie. Soos alle kraanvoëls vreet hulle insekte, klein reptiele en ander kleinerige diere.
Die nes bestaan uit 'n platform van gras en ander plantmateriaal in hoë vleiland plantegroei. Die mahem lê 2 tot 5 eiers en albei geslagte maak beurte om dit uit te broei. Die proses duur tussen 28 en 31 dae, en die kleintjies verlaat die nes binne 56 tot 100 dae.
Hoewel die mahem steeds algemeen voorkom in baie van sy gebiede, staar dit bedreiging in die gesig, as gevolg van die uitwissing van sy habitat deur die dreinering en oorbeweiding, asook gifbesoedeling.
Verspreiding
[wysig | wysig bron]Die mahem kom voor in die droë savanne-streke in Afrika, suid van die Sahara, hoewel hulle broei in ietwat natter habitats.
Daar is twee subspesies. Die Oos-Afrikaanse B. r. gibbericeps kom voor in 'n gebied wat strek vanaf die oostelike Demokratiese Republiek van die Kongo deur Uganda en Kenia na die oostelike deel van Suid-Afrika. Dit het 'n groter kaal, rooi gesigvel bokant die wit kol op die wang as die ander, B. r. regulorum , wat vanaf die suide van Angola tot in Suid-Afrika voorkom. Die mahem is die nasionale voël van Uganda en word op hulle nasionale vlag uitgebeeld.
Geluid
[wysig | wysig bron]Sy tweenoot-getrompetter klink soos "ma-hem", vandaar sy naam.
Ander name
[wysig | wysig bron]- Engelse naam: "Grey-Crowned Crane"
- Wetenskaplike naam: Balearica regulorum
Sien ook
[wysig | wysig bron]- Alfabetiese lys van Suid-Afrikaanse voëls
- Lys van Suid-Afrikaanse voëls (Groepeer)
- Lys van Suider-Afrikaanse voëls volgens wetenskaplike name
Bronnelys
[wysig | wysig bron]Verwysings
[wysig | wysig bron]- ↑ BirdLife International (2016). "Balearica regulorum". IUCN Red List of Threatened Species. 2016: e.T22692046A93334893. doi:10.2305/IUCN.UK.2016-3.RLTS.T22692046A93334893.en. Besoek op 19 November 2021.
- ↑ "Appendices | CITES". cites.org. Besoek op 14 Januarie 2022.
Eksterne skakels
[wysig | wysig bron]- International Crane Foundation Grey-crowned Crane page Geargiveer 19 Junie 2008 op Wayback Machine
- Saving Cranes website (ICF)
- Craneworld website Geargiveer 7 September 2007 op Wayback Machine