Hokey Pokey

Die Hokey Pokey (uitgespreek as "hou-kie pou-kie"), soms ook bekend as die Hokey Cokey, is 'n dansie waarin verskeie individue kan deelneem. Dit het 'n kenmerkende deuntjie en lirieke. Die dansie is baie populêr in Engelssprekende lande, en veral onder jong kinders. Dit is onbekend presies hoe en waar die dansie ontstaan het. Daar is twee tradisies van die dansie wat in twee verskillende dele van die wêreld ontwikkel het.

Verenigde State

In die Verenigde State het hierdie dansie in die 1950's populêr geword onder die benaming "Hokey Pokey". Die kopiereg van die gepaardgaande liedjie is in 1950 aan Larry LaPrise, Charles Macak en Tafit Baker toegestaan. Die legende lui dat hierdie trio die pretdansie in 1949, ter vermaking van die ski-mense by Idaho se Sun Valley-oord, geskep het. Hierdie legende kan nie as waar beskou word nie, omdat die dansie reeds baie gewild onder die Amrikaanse en Britse diensmag was tydens die Tweede Wêreldoorlog.

Brittanje

In Brittanje staan hierdie dansie bekend as die Hokey Cokey en het dit presies dieselfde lirieke, deuntjie en dansie as die Amerikaanse weergawe daarvan. Dit was gewild in Engeland gedurende die 1940's. In die Londense Cockney-uitspraak staan die dansie bekend as die "Okey-cokey". Die dansie word wyd beskou as 'n tradisie.