George Lincoln Rockwell

	George Lincoln Rockwell
	;
	Aanvoerder van die Amerikaanse Nazi-party
	Ampstermyn; Maart 1958 – 25 Augustus 1967
Voorafgegaan deur	Amp geskep
Opgevolg deur	Matt Koehl
Leier van die Wêreldunie van Nasionaal-Sosialiste
	Ampstermyn; 1962 – 25 Augustus 1967
Voorafgegaan deur	Amp geskep
Opgevolg deur	Matt Koehl
Persoonlike besonderhede
Gebore	9 Maart 1918 ; Bloomington, Illinois, Verenigde State
Sterf	25 Augustus 1967 (op 49); Arlington County, Virginië, Verenigde State
Politieke party	Amerikaanse Nazi-party
Eggenoot/-note	Judy Aultman (1943-1953); Þóra Hallgrímsdóttir (1953-1961)
Militêre Diens
Lojaliteit	Verenigde State
Diens/Tak	Amerikaanse Vloot
Jare in diens	1941–1960
Rang	Bevelvoerder
Oorloë/Veldslae	Tweede Wêreldoorlog; Korea-oorlog
Toekennings	; American Defense Service Medal; American Campaign Medal; Asiatic-Pacific Campaign Medal; European-African Middle Eastern Campaign Medal; World War II Victory Medal; National Defense Service Medal; Naval Reserve Medal; Philippine Liberation Medal;

George Lincoln Rockwell (* 9 Maart 1918 – † 25 Augustus 1967) was die stigter en leier van die Amerikaanse Nazi-party en moontlik een van die mees berugte Amerikaanse neo-Nazi-leiers.

Vroeë lewe

Rockwell is gebore in Bloomington, Illinois met sy pa (George Lovejoy Rockwell) van Engels–Skotse herkoms en sy ma (Claire Schade Rockwell) van Duits–Franse herkoms. Rockwell word groot met geskeide ouers, beide was bekende vaudeville komediante en akteurs, van wie hy sy vaardighede vir openbare redevoering en die hantering van skares aangeleer het. Hy studeer aan die Hebron-akademie in Lewiston, Maine. Nadat hy sy studies gestaak het aan die Brown-universiteit, sluit hy aan by die Amerikaanse Vloot waar hy tydens die Tweede Wêreldoorlog gedien het.

Politiek

Rockwell het na radiouitsendings van Joseph McCarthy geluister en het Douglas MacArthur se nominasie as die Republikeinse kandidaat vir President van die Verenigde State gesteun. Hy woon 'n Gerald L.K. Smith-byeenkoms by en lees die Common Sense-koerant waardeur hy kennis maak met die sogenaamde Joodse vraagstuk. Hy lees Mein Kampf en word daarna 'n ondersteuner van die Nasionale Sosialistiese ideologie. In 1952 word hy verplaas na die Amerikaanse vlootlugmagbasis in Keflavik, Ysland, waar hy sy tweede eggenote ontmoet (Thora Hallgrimson), en bring sy wittebroodsdae deur te Berchtesgaden. Op 8 Maart 1959 stig hy die Amerikaanse Naziparty. Hy was onder andere dié party se goewerneurskapskandidaat vir Virginië in 1965.

George Rockwell het ook gepoog om 'n konserwatiewe koerant te stig met die doel om die wat hy noem "versplinterde en strydende regsgesindes in 'n samehangende en effektiewe organisasie" saam te snoer.

Sluipmoord

Om 12:20 n.m. op 25 Augustus 1967 word Rockwell met twee skote doodgeskiet in Washington D.C.. Kort na die skote word die nege-en–twintigjarige John Patler gearresteer en aangekla vir Rockwell se moord. Patler wat sy naam wettiglik verander het van John C. Patsalos, was 'n voormalige leier van die Amerikaanse Naziparty en Rockwell se redakteur van die party se nuusbrief "The Stormtrooper". Hy het meeste van die artikels in die nuusbrief self geskryf. Sommige individue het selfs Patler beskou as die medestigter van dié party saam met Rockwell. In die eerste uitgawe van Rockwell se outobiografie "This Time the World" verskyn 'n foto van Patler met 'n partyvlag; wat in latere uitgawes uitgelaat is.

Na die moord het Matt Koehl verslaggewers ingelig dat Patler in April 1967 omrede sy "Bolsjewistiese neigings" uit die party geskop is. Die hoofbeskuldiging teen hom was dat hy Marxistiese propaganda in die nuusbrief "The Stormtrooper" ingesluit het.

Verskeie indiwidue het van Rockwell se party weggebreek om "The White Party" te vorm slegs enkele maande voor die sluipmoord. Dié indiwidue het volgehou dat Patler onskuldig is. In Desember 1967 word John Patler gevonnis tot 20 jaar tronkstraf vir die moord op George Lincoln Rockwell.

Rockwell se begrafnis is op 30 Augustus 1967 gehou, maar die Pentagon het sy teraardebestelling in die Nasionale Begraafplaas Culpepper verbied omdat sy volgelinge nie hulle swastika gebosseleerde armbande wou afhaal voor hul die bergraafplaas betree het nie. Sy oorskot is teruggeneem na die hoofkantoor van die Amerikaanse Naziparty in Arlington waar hy veras is tydens 'n geheime Nazibegrafnis op 31 Augustus 1967.

Werke

In Hoc Signo Vinces, 'n politieke manifes (World Union of Free Enterprise National Socialists, 1960)
How to get out or stay out of the insane asylum, vertel sy wedervaringe nadat hy veroordeel is tot 'n periode van dertig dae vir psigiatriese waarneming (American Nazi Party, 1960)
This Time The World, sy outobiografie (geskryf 1960; White Power Publications, 1979; Liberty Bell Publications, 2004, ISBN 1-59364-014-5).
White Power (geskryf 1967; John McLaughlin, 1996, ISBN 0-9656492-8-8)

Verwysings

Hate: George Lincoln Rockwell and the American Nazi Party deur William H. Schmaltz (Brasseys, Inc., 2001, ISBN 1-57488-262-7).
American Fuehrer: George Lincoln Rockwell and the American Nazi Party deur Frederick James Simonelli (University of Illinois Press, 1999, ISBN 0-252-02285-8).
Siege: The Collected Writings of James Mason deur James Mason (Aanhangsel III bevat Mason se "George Lincoln Rockwell: A Sketch of His Life and Career"; ingelei deur Ryan Schuster, Black Sun Publications, ISBN 0-9724408-0-1)
"Rockwell, U.S. Nazi, Slain; Ex-Aide is Held as Sniper", Graham, Fred P., New York Times, Saterdag, 26 Augustus 1967, bladsye 1, 14.
"Rockwell Burial Causes A Dispute", New York Times, Sondag, 27 Augustus 1967, bladsy 28.