Gendarmenmarkt
Die Gendarmenmarkt is een van die mooiste Berlynse pleine. Dit word oorheers deur twee Protestantse domkerke aan weerskante.
Die plein het aan die einde van die sewentiende eeu ontstaan as 'n markplein van die nuwe voorstad Friedrichstadt. Dit is vernoem na die Regiment Gens d'Armes wat hier hul kaserne gehad het. In 1950 is die plein, wat in die destydse Oos-Berlyn geleë was, hernoem na Platz der Akademie, maar met die hereniging van Berlyn in 1990 is die oorspronklike naam herstel.
In die sentrum van die plein, voor die ingang van die konsertgebou, is 'n monument ter ere van die digter Friedrich Schiller opgerig. Die konsertgebou (Konzerthaus) is tussen 1818 en 1821 deur die Berlynse argitek Karl Friedrich Schinkel gebou en het oorspronklik as skouburg gedien.
Die twee kerke aan weerskante van die plein sien met eerste oogopslag eenders uit, maar verskil wel. Die Franse Domkerk (Französischer Dom) aan die regterkant van die konsertgebou is tussen 1701 en 1705 vir Franse Hugenotevlugtelinge gebou wat hulle in Berlyn gevestig en hier hul eie gereformeerde gemeente gestig het. Die Deutscher Dom ("Duitse Domkerk") is in 1708 vir die Duitssprekende gemeente opgerig.
Geskiedenis
[wysig | wysig bron]Die plein is teen die einde van die 17de eeu volgens planne van Johann Arnold Nering aangelê - op 'n tydstip toe Franse immigrante, hoofsaaklik Hugenote, hulle in die buurt gevestig het. Die plein, waar 'n mark gehou is, het verskeie kere van naam verander. So is dit - in chronologiese volgorde - Esplanade, Lindenmarkt, Friedrichstädtischer Markt en Neuer Markt genoem. In 1799 het dit sy huidige naam Gendarmenmarkt ontvang - na aanleiding van die garderegiment Gens d'armes. Die regiment se waghuis en perdestalle was tussen 1736 en 1782 hier geleë.[1]
Verwysings
[wysig | wysig bron] |
Wikimedia Commons bevat media in verband met Gendarmenmarkt. |
