Famadihana
Famadihana is ’n begrafnisritueel van Madagaskar. Dit is bekend as die "draai van die bene" en behels dat die oorskot van afgestorwe Malgasse uit die familiegraftombes gehaal en in vars linne toegedraai word. Daar word dan op die maat van musiek met die lyke gedans voordat dit herbegrawe word.[1]
Dit lyk of die gebruik van redelik onlangs dateer, moontlik uit die 17de eeu in sy huidige vorm. Dit kan egter ’n aanpassing van ’n vroeëre, Suidoos-Asiatiese dubbele begrafnis wees. Die gebruik is geskoei op die geloof dat die geeste van die afgestorwenes eindelik die wêreld van die voorvaders betree ná die algehele ontbinding van die lyk en die gepaste seremonies, wat baie jare kan duur. In Madagaskar het dit tot ’n ritueel elke sewe jaar gelei. Die gebruik bring uitgebreide families saam om familiebande te vier.
Famadihana is aan die afneem weens die koste van doodsklede van sy en die geloof onder moderne Malgasse dat dit outyds is. Vroeëre sendelinge het die gebruik ontmoedig en Evangeliese Christene sien al hoe meer af daarvan. Die Katolieke Kerk maak egter nie meer beswaar daarteen nie omdat hulle dit as suiwer kultureel beskou en nie as ’n godsdienstige praktyk nie. Soos ’n Malgassiese man aan die BBC verduidelik het: "Dis belankrik, want dit is ons manier om die afgestorwenes te eerbiedig. Dit is ook ’n kans vir die hele familie, van oor die hele land, om byeen te kom."[1][2]
Verwysings
[wysig | wysig bron]Eksterne skakels
[wysig | wysig bron]
Hierdie artikel is vertaal uit die Engelse Wikipedia
