Erik Holm
Erik Holm is op 4 Julie 1945 in Ollendorf, Duitsland gebore, en is ’n Suid-Afrikaanse entomoloog en insekillustreerder.
Lewensloop
[wysig | wysig bron]In 1948 vestig sy ouers hulle in die omgewing van die Hartbeespoortdam naby Pretoria. Hy kry sy skoolopleiding by Kameeldrift Laerskool, Generaal Hendrik Schoeman Laerskool en uiteindelik Brits Hoërskool.
In die Magaliesberg versamel hy van kleins af insekte, monteer geraamtes van diere en stop voëls op. Met die aanmoediging van sy kunstenares-moeder Elly Holm begin hy in sy hoërskooljare biologiese illustrasiewerk doen, en werk in vakansies onder dr. Charles Koch, die beroemde coleopteroloog, aan die Transvaal Museum. Besonder entoesiastiese biologie- en houtwerkonderwysers by sy hoërskool het 'n groot en blywende invloed op sy beroepskeuse en liefhebberye gehad.
Hy behaal in 1966 sy BSc-graad aan die Universiteit van Pretoria. Hierna was hy vier jaar lank tegniese assistent van dr. Koch by Gobabeb in die Namibwoestyn. In 1969 word hy insektaksonoom by Landbou-tegniese Dienste. Hy verwerf in 1970 die MSc-graad en in 1974 die DSc-graad aan die Universiteit van Pretoria. In 1975 word hy lektor in die Departement Entomologie, Universiteit van Pretoria, in 1977 word hy bevorder tot senior lektor en in 1980 tot professor en hoof van die Departement. Aan die einde van 1994 neem hy vervroegde aftrede weens gesondheidsredes.
Bydraes
[wysig | wysig bron]Hy het reeds meer as 69 wetenskaplike en populêr-wetenskaplike tydskrifartikels oor insekekologie, -taksonomie en -evolusie gepubliseer. Hy het ook 14 populêrwetenskaplike en twee wetenskaplike boeke oor veral insekte en insekgedrag gepubliseer en saam met prof. C.H. Scholtz, een van sy oudstudente, as redakteur opgetree om die gesaghebbende Insects of Southern Africa die lig te laat sien. Hy het ook ‘n kinderboek "Geheime in die tuin" gepubliseer. Holm neem seder die 1980 deel aan natuurprogramme, eers by Radio Suid-Afrika, later by Radio Pretoria en tans Pretoria FM, waar hy luisteraars se vrae oor insekte en die biologie beantwoord en interessanthede,dikwels met 'n filosofiese aanslag, oor insekte, ekologie en evolusie vertel. Hy het in dié tyd ook talle ander radiopraatjies oor insekte uitgesaai, meesal vir die jeug. Hy het ook al meermale op televisie verskyn en het in 1986 sy eie televisiereeks van 13 programme oor insekgedrag ("Insekgedrag menslik betrag") aangebied. In 1990 voltooi hy 'n opvolgreeks van die vorige televisiereeks (agt programme) oor arthropoda-gedrag ("As hy jou byt") vir die SAUK. Hy vervaardig ook verskeie korter films oor die natuur vir die SAUK (verskeie vir "50/50"; tien vir "Tekkies"; 3 vir "TV3"). Hy was ook 'n mede-aanbieder van die natuurprogram Projek Aardwolf op KykNET.
Holm het ook twee reekse van vier seëls elk oor Suid-Afrikaanse en Suidwes-Afrikaanse insekte geïllustreer wat in onderskeidelik Maart en Mei 1987 verskyn het. Hy het sedert 1975 verskeie avontuurlike navorsingsekspedisies in Suider-Afrika, veral na die Namibwoestyn, onderneem en was verskeie male in die buiteland.
Stokperdjies en belangstellings
[wysig | wysig bron]Stokperdjies (behalwe entomologie) is hoofsaaklik handwerk, veral die bou van meubels, musiekinstrumente, weefstoele en die herbou van motors en waens. Hy bou Die Ring Ossewa Herberg naby Harbeespoortdam en bedryf die Ekogilde Uitgewery. Op die gebied van musiek doen hy by geleentheid mee aan koorsang, en kamermusiek met die dwarsfluit en kitaar.
Hy was ook onder andere: direksielid en omgewingsraadgewer vir die ZZ2-Boerdery (spesialiteit ekologie en stelselteorie); besig met herbou van afgebrande huis; restoureer van ou rytuie; gee van publieke lesings (temas: ekologie, strategie, leierskap, dieregedrag, evolusie, historiese ambagte, ens.); deelname aan weeklikse radioprogram oor die natuur; die skryf van 'n gereelde rubriek in Beeld.
Persoonlike lewe
[wysig | wysig bron]Holm woon met sy vrou Elsabé, op hulle plaas by die Hartbeespoortdam. Hy het 3 dogters, 1 seun en twee kleinkinders.
Bronne
[wysig | wysig bron]- A.E. van Wyk, Departement Plant- en Grondwetenskappe, Universiteit van Pretoria, Motivering vir die toekenning van die Senior Kaptein Scott-gedenkmedalje aan prof. Erik Holm vir sy wetenskaplike en ander vakkundige bydraes tot die entomologie, asook die bevordering van 'n belangstelling in insekte en die natuur onder die algemene publiek, veral in Afrikaans.
- Erik Holm Curriculum Vitae
