Duiwelspiek

Duiwelspiek
	Duiwelspiek soos vanaf Tafelberg gesien.
Ligging	Wes-Kaap, Suid-Afrika
Hoogte	1 000 meter bo seevlak
Koördinate	33°56′S 18°23′O / 33.933°S 18.383°O
	; Duiwelspiek

Duiwelspiek is deel van die Tafelbergreeks in Kaapstad, Suid-Afrika. Indien die piek vanaf die hawe suidwaarts besigtig word, is die spitspunt van Duiwelspiek links van die plat tafelkruin van Tafelberg, waarna (regs en wes van Tafelberg) die koepel van Leeukop en dan Seinheuwel volg.

Duiwelspiek vanuit Nuweland-krieketveld gesien

Die oorspronklike Kaapstadse nedersetting (wat deesdae die stadskom genoem word) lê in die natuurlike amfiteater wat deur hierdie natuurverskynsels gevorm word.

Duiwelspiek, soos die res van hierdie heuwels, is gevorm uit Tafelbergsandsteen. Daaronder lê graniet en skalie, maar hierdie materiale word nie aan Duiwelspiek se hange aangetref nie.

Duiwelspiek is 1 000 meter hoog, laer as Tafelberg se 1 087 meter. Die plantegroei aan die hange is tipiese Kaapse fynbos.

Aan die suidekant van Duiwelspiek is die Rhodes-gedenkteken, 'n aandenking aan Cecil Rhodes, asook die Universiteit van Kaapstad wat oor die suidelike voorstede van Kaapstad uitkyk: oor die Kaapse Vlakte na Stellenbosch, Somerset-Wes en die Hottentots-Hollandberge in die verte.

Benaming

'n Kopergravure uit Jürgen (of Georg) Andersen se reisbeskrywing van 1644 dui Duiwelspiek aan as die Blaseballch, oftewel Blaasbalk.^[1] Die berg se eerste amptelike naam was egter Windberg, maar dit is Duiwelsberg genoem deur die inwoners as 'n soort bynaam. Al hierdie name kan moontlik verbind word met die idee dat die berg vir die stormagtige suidoostewind verantwoordelik was wat baie skade aan skepe in Tafelbaai aangerig het. Terwyl daar eintlik 'n suidwestewind waai, draai die piek die wind sodat 'n suidooster gevorm word wanneer dit by die berg verbytrek.

In Nederlands het die berg nooit Duiwelspiek geheet nie, maar eerder Duiwelsberg. Vroeg in die 19e eeu het die Engelse benaming Devil's Peak egter in gebruik gekom, en Duiwelspiek is waarskynlik 'n direkte vertaling hiervan.^[2]

Daar bestaan ook 'n volkslegende wat die benaming op 'n ander manier verduidelik. Duiwelspiek se naam kom glo uit 'n volksverhaal oor 'n man genaamd Van Hunks.

Sien ook

Tafelberg

Verwysings

↑ Biblioteek kry kosbare Afrikana, Lorinda de Klerk, Matieland 2:88, Jaargang 32, ISSN 0025-8637, bladsy 27
↑ H. Liebenberg, Die ontstaan van Kaapse plekname, Deel van die projek: TRANSKRIBERING VAN VOC-DOKUMENTE IN KAAPSTADSE ARGIEFBEWAARPLEK

Eksterne skakels

Wikimedia Commons het meer media in die kategorie Duiwelspiek.

[1] Biblioteek kry kosbare Afrikana, Lorinda de Klerk, Matieland 2:88, Jaargang 32, ISSN 0025-8637, bladsy 27

[2] H. Liebenberg, Die ontstaan van Kaapse plekname, Deel van die projek: TRANSKRIBERING VAN VOC-DOKUMENTE IN KAAPSTADSE ARGIEFBEWAARPLEK

[1]

[2]