Così fan tutte
| Così fan tutte | |
|---|---|
| ossia La scuola degli amanti | |
| deur W. A. Mozart | |
 Die eerste uitvoering van Così fan tutte. | |
| Katalogus | K. 588 |
Così fan tutte, ossia La scuola degli amanti (Italiaans: [koˈzi fan ˈtutte osˈsiːa la ˈskwɔːla deʎ aˈmanti]), K. 588, is 'n komiese opera (opera buffa) deur Wolfgang Amadeus Mozart. Daarin bak twee mans twee susters 'n poets om te toets of die vroue regtig vir hulle lief is en aan hulle getrou sal wees.[1]
Die opera het twee bedrywe volgens die libretto (teks) van Lorenzo da Ponte. Die eerste opvoering was op 26 Januarie 1790 in Wene en was 'n groot sukses. Omdat keiser Jozef II op 20 Februarie 1790 oorlede is, word alle teaters gesluit en word die opera eers weer in Junie 1790 hervat.
Così fan tutte word nog steeds reëlmatig in die groot operahuise oor die wêreld opgevoer en word as een van Mozart se mees musikale operas beskou. Volgens oorlewering is die opera gebaseer op 'n werklike gebeurtenis wat in Wene plaasgevind het. In die 19de eeu is die opera as ietwat stuitig beskou, en is dit selde opgevoer. Ander operas soortgelyk in uitvoering en styl is Le nozze di Figaro en Don Giovanni, eweneens op die libretti van Da Ponte gebaseer.
Die titel beteken "So doen hulle almal" of "Die skool vir geliefdes" en sinspeel op die onbetroubaarheid van vroue in die liefde.
Rolverdeling
[wysig | wysig bron]- Fiordiligi, geliefde van Guglielmo en suster van Dorabella – sopraan
- Dorabella, geliefde van Ferrando en suster van Fiordiligi – mezzosopraan
- Guglielmo, jong offisier – bariton
- Ferrando, jong offisier – tenoor
- Despina, bediende – sopraan
- Don Alfonso, vriend van die offisiere – bas
Storielyn
[wysig | wysig bron]Die opera speel in die 18de eeu in Napels af. Don Alfonso wed twee jong offisiere dat hulle geliefdes ontrou sal wees as hul die kans kry. Die mans aanvaar die weddenskap. Hulle vertel hul geliefdes dat hulle vir diens opgeroep is en uit Napels vertrek.
Hulle kom egter terug, as Albaneërs vermom, om by mekaar se geliefde aan te lê. Met die sameswering van Despina stem die twee susters in om met die buitelanders te trou. Op die laaste oomblik verwyder die mans hul vermomming, en bestraf hulle hul ontrou geliefdes.
Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
Eksterne skakels
[wysig | wysig bron]
Wikimedia Commons het meer media in die kategorie Così fan tutte.
