Bosveld
| Bosveld | ||||
| Ekostreek | ||||
| ||||
| WWF-kode | AT0717 | |||
| Bioom | Tropiese of subtropiese grasveld, savanne en struikveld | |||
| Ekosone | Afrotropiese gebied | |||
| Floraryk | Paleotropis | |||
| Oppervlakte | 223 000 km² | |||
| Beskerm | % | |||
| ||||
| Bosveldtoneel | ||||
| ||||
Die Bosveld is 'n subtropiese bos- en struikveld ekostreek van Suider-Afrika. Dit sluit die meeste van die Limpopoprovinsie en 'n klein deel van die Noordwesprovinsie van Suid-Afrika in, asook die Sentraal- en Noord-Oostelike distrikte van Botswana, Matabeleland-Suid en 'n deel van die Matabeleland-Noord provinsies van Zimbabwe.[1]
Geografie
[wysig | wysig bron]Die hoogte van hierdie streek wissel van 750 tot 1 400 m en die jaarlikse reënval van 350 mm in die weste tot 600 mm in die noordooste. Daar is drie belangrike bergreekse in die streek: die Drakensberg-platorand wat deel van die oostelike grens van die Bosveld uitmaak en loop van Tzaneen in die noorde tot by Belfast in die suide; die Waterbergreeks wat strek vanaf Mokopane in die ooste tot by Thabazimbi in die weste; en die Soutpansberg net noord van Louis Trichardt. Laasgenoemde is die mees noordelike bergreeks in Suid-Afrika.
Flora en fauna
[wysig | wysig bron]Soos afgelei kan word uit die streek se naam, bestaan die Bosveld uit grasryke vlaktes besaai met digte trosse van bome en hoë struike. Die grasse wat hier voorkom, groei oor die algemeen hoog en welig, en verkleur vaal of bruin in die winter, wat die droë seisoen in die meeste van Suid-Afrika is. Die onverstoorde gedeeltes van hierdie habitat, soos baie van die Waterbergbiosfeer, bied skuilplek aan groot soogdierspesies soos witrenosters, swartrenosters, kameelperde, blouwildebeeste, koedoes, rooibokke en 'n verskeidenheid van ander wildspesies.
Die mopaniebosveld is amper rypvry omdat dit laer lê as die hoëveld wat aan die suidekant daarvan geleë is. Die dominante boomspesie is die mopanie. In die noorde rondom Bulawayo gaan dit oor in 'n boomsavanne met grasse soos Hyparrhenia filipendula en H. dissoluta en bome soos Terminalia sericea en Burkea africana. In die suidweste, die Springbokvlakte, tref mens die doringbosveld aan met talle Acacia-spesies soos Acacia tortilis, A. nilotica, S. nigrescens, A. gerrardii en V. karroo en polgrasse soos Ischaemum afrum en Sehima galpinii. Die Waterberggebied word deur Faurea saligna, Acacia caffra, en Peltophorum africanum gekenmerk.[2]
Geologie
[wysig | wysig bron]Die Bosveld is een van die mees mineraal-ryk streke van die wêreld. Dit is te danke aan die Bosveldstollingskompleks, 'n baie ryk pieringvormige geologiese formasie wat oor meer as 50 000 vierkante kilometer strek. Hierdie kompleks bevat die meeste van die wêreld se reserwes van minerale soos andalusiet, chroom, vloeispaat, platinum en vanadium. Die kompleks sluit ook die Merenskyrif in, wat die wêreld se grootste bron van platinum sowel as platinum-groep metale is.
Boerdery
[wysig | wysig bron]Meeste dele van die streek is geneig om baie droog te wees. Dus is die Bosveld grootliks bees- en wildplaas-wêreld, waar slegs 'n paar droogtebestande gewasse soos sorghum en gars geproduseer word, gewoonlik onder besproeiing.
Dorpe in die Bosveld
[wysig | wysig bron]
|
Natuurbeskerming
[wysig | wysig bron]- Mapungubwe Nasionale Park
- Maremani
- Pilanesberg Nasionale Park
- Mokolodam-natuurreservaat (voorheen: Hans Strijdom reservaat), Grootwater en Thiane
- Doorndraai Dam Natuurreservaat
Sien ook
[wysig | wysig bron]Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ "WWF AT0717" (in Engels). Geargiveer vanaf die oorspronklike op 4 April 2019.
| Hierdie artikel is in sy geheel of gedeeltelik vanuit die Engelse Wikipedia vertaal. |
