Bladveer
'n Bladveer is 'n eenvoudige tipe veer en word algemeen ingespan in die veringstelsel van motorvoertuie. Dit is ook een van die oudste vorms van vere en is reeds in die middeleeue ingespan.
Daar word somtyds na die tipe veer as 'n semi-elliptiese veer of waveer verwys. Dit neem die vorm aan van 'n slanke boogvormige staaf met 'n reghoekige deursnee wat uit veerstaal vervaardig word. Die as word aan die middelpunt van die boog ondersteun, terwyl daar gate aan elke punt is, waar die veer met boute aan die onderstel geheg word. Vir swaarvoertuie kan die bladveer bestaan uit verskeie blaaie wat in lae opmekaar gestapel word.
Bladvere was tot en met die 1970's nog algemeen in gebruik in motorvoertuie, toe die verskuiwing na voorwielaandrywing en meer gesofistikeerde veringstelsel-ontwerpe deur motorvervaardigers. Bladvere word egter nog steeds gebruik in kommersiële swaarvoertuie soos bakkies en vragmotors en treinwaens.
'n Meer moderne tipe vorm is die paraboliese bladveer. Hierdie ontwerp word gekenmerk deur minder blaaie waarvan die dikte volgens 'n paraboliese kromme variëer vanaf die middel tot by die punte. Met hierdie ontwerp is wrywing tussen die blaaie ongewens en daarom is dit belangrik dat die enigste kontak tussen die blaaie by die punte, en in die middel waar die as ondersteun word, plaasvind. Skeiplate ward gebruik om kontak op enige ander punt tussen die vere te vermy. Buiten die massabesparing is die hoofvoordeel van paraboliese vere hul groter soepelheid, wat 'n verbeterde ritervaring byna soortgelyk aan dié van spiraalvere meebring. Die dravermoë van die ontwerp is egter laer as dié van die konvensionele bladveer.
Sien ook
[wysig | wysig bron]Eksterne skakels
[wysig | wysig bron]
Wikimedia Commons het meer media in die kategorie Bladveer.
