Antonof An-225

An-225 Mriya
Die Antonof-225 by die München Lughawe
Tipe	Strategiese lugvragdraer
Vervaardiger	Antonof
Nooiensvlug	21 Desember 1988
Status	Vernietig tydens die Russiese inval in Oekraïne, 2022
Hoofgebruiker	Antonof-lugdiens (een)
Vervaardig	1988
Aantal gebou	1 (tweede gedeeltelik gebou)
Ontwikkel van	Antonof An-124

Die An-225 Mrija (Oekraïens: Антонов Ан-225 Мрія, NAVO-verslagnaam: Cossack) is 'n strategiese lugvragdraer wat deur Antonof gebou is. Dit is die grootste vliegtuig wat ooit gebou is in terme van bruto opstygmassa. Dit was ontwerp en gebou om die Russiese ruimtetuig Boeran (beteken "Sneeustorm") te vervoer, en was 'n vergroting van die suksesvolle Antonof An-124. Mrija (Мрія) beteken "droom" of "inspirasie" in Oekraïens.

Met 'n totale bruto massa van 640 ton is die An-225 die swaarste en grootste vliegtuig ter wêreld. Dit het 'n vlerkwydte van 88 m, 'n rompdeursnee van 19 m en 'n sterthoogte van 18 m. Die Hughes H-4 Hercules, wat algemeen as die "Spruce Goose" bekend staan, het 'n groter vlerkspan en algehele hoogte gehad, maar was aansienlik korter, en as gevolg van die materiale wat gebruik is om dit te bou, ook ligter. Verder het die Hercules slegs een keer gevlieg, en nie baie hoog nie, wat die An-225 die grootste vliegtuig maak wat veelvuldig opgestyg het. Die An-225 is ook groter as die Airbus A380 en heelwat groter as die Antonof An-124, 747-400ERF en die Lockheed C-5 Galaxy, die naasgrootste swaar lugvervoerder.

Met die beëindiging van kommunisme in die Sowjetunie in 1991, was daar geen militêre nut meer vir die Antonof-225 nie. Nadat dit vir 8 jaar verwaarloos op die grond in die Oekraïne gestaan het, is dit herstel, gerestoureer en opgradeer met al die nuutste toerusting. In April 2001 styg dit weer op en vlieg nou gereeld as reuse vragdraer in 'n siviele kapasiteit, op sendings na al die uithoeke van die wêreld.

Die vliegtuig, is op 27 Februarie 2022 tydens die Slag van die Antonof-lughawe vernietig.