Averowesse

Averowesse ou Ben Rachid (e-n arabe ابن رشد, Ibn Rouchd), c' est on filozofe, on teyolodjin, on djurisse, on matematikî et on medcén d' Andalouzeye muzulmane di 12inme sieke. I djåzéve et scrire ses ouves e l' arabe, come tos les intelectuwels d' Andalouzeye di ces trevéns la.

Il vna å monde e-n 1126 a Cordowe. I mora li 10 di decimbe 1198 à Marakech, mins s' coir fourit revoyî a Cordowe, acpagnté pa Ben Aarabi.

Ses idêyes

I ristudia l' prumî les scrijhaedjes d' Aristote. C' est la k' i veya ki les idêyes des vîs filozofes estént pacô distournêyes, et nén todi dins l' minme sinse pa les ratourneus do grek.

Adon, i tuza di fé ene sinteze del pinsêye d' Aristote et del rilidjon islamike. Mins c' est adon k' i s' va acweri des rujhes, ostant avou les muzulmans (fizicmint et morålmint) k' avou les crustins (morålmint, bon k' i studiént timpesse ses scrijhaedjes).

I va esse metou a l' indecse del Sorbone, metans, pask' i djheut ki les accions des djins morént avou zels. Li riscompinse po s' boune kidujhance ou l' penitince po des målès keures, on l' a ddja cial sol tere. Ciste idêye la est contråve al cene do dierin djudjmint do crustinnisse et do decidaedje do Bon Diu al moirt di l' islam.