Livonnia

ZE-P	Sta paggina chie a l'è scrita in zeneize, co' ina grafia tipo quella do Prian do 1745

A región stòrica da Livònnia

Livonnia (lettone Vidzeme; ruscio Livonija; ted. Livland) region storica baltica (47.000 km2) esteiza tra Letonnia a S e Estonnia a N, sudivisa a partî da-o 1920 tra i doi paixi, seguindo un confin etnico.

Area de tranxito de popoli rivæ, a Livonnia a l'emerse inta stoia in gio a-o 9° sec., quand'a commençò a êse percorsa da Scandinavi, Rusci, Lituen. Verso a segonda meitæ do 12° sec. a so popolaçion, i Livoin, a l'ea divisa inte quattro unitæ polittiche, sádamènte organizzæ. Promotô de l'evangelizzaçion e da conquista todesca da Livonnia fu l'Alberto de Buxhövden, consacrao vescovo da Livonnia into 1199. Con l’agiutto di croxæ (into 1204 l'Innocenço III, co-ina bolla, o l'aveiva equiparao a parteçipaçion a-a croxâ in Livonnia a-a parteçipaçion a-e croxæ in Tæra Santa) e de l'Orde di Portaspâ, l'Alberto, che into 1201 o l'aiva fondao a çittæ de Riga fissandoghe a sede vescovî, o sottomisse i Livoin, quindi i Seloin, i Letgalli e i Estoni. Into 1207 o vescovo o se feççe reconosce, da-o Feipo de Svevia, segnô da Livonnia, da aloa fœüdo de l'impeo. O teritoio conquistao o fu sudiviso into 1226 inte træ parte inguæ tra o vescovo, a çittæ de Riga e l’Orde di Portaspaa. Into 1236 (o vescovo Alberto o l'ea morto into 1229) i Portaspaa subin una sanguinosa sconfita da parte di Lituen.

L’Orde Tœütonico o l'assonse l’ereditæ di Portaspâ deximæ e o proseguì a lotta contra i Curioin e i Semgalli, scin a sottomettili definitivamente. Intrâ inte l'ambito de l'impêo, a Livonnia a fu tiatro pe ciu che trei secoli di aspie lotte fra a Gexa (arçivescovo de Riga), l’Orde Tœütonico e a Hansa. O longo dominio tœütonico, ch'o duò scin a-o 1561, o ridusse e popolaçioin agricole a-o stato de servitù da gleba e o no consentì o formâse de 'na classe dirizente da-a nobiltæ fœüdâ, lettone e estone.

Devastâ into 1558 da l'Ivan IV, in man a-a Polonia da-o 1541 a-o 1621, da Sveçia da-o 1621 a-o 1710, quande a fu ocupâ da-e truppe do zar, a-o termine da grande guæra nordica a Livonnia a fu cedua a-a Ruscia (1721), ch'a-a tègne scin a-o 1918, inserindola inte coscì díte Provinçe Baltiche. A seguì da pœu e sciorte da Lettonia.

Atri progetti

Altri progetti

• Wikimedia Commons

• Wikimedia Commons a contêgne di files in sce Livonnia