Wulfilaich

Wulfilaich
Titel
Biographie
Gebuertsnumm	Wulfilaic
Gebuer	565 jul. Lombardei
Gestuerwen	600 jul. Margut
Aktivitéit	Sailenhellegen, Klouschtergrënner
Aner Informatiounen
Statut	Helleg
Gedenkdag	21. Oktober
D'Graf vum Wulfilaich an der « Église Saint-Walfroy » zu Margut (Departement Ardennes)

D'Plaz vun der Klaus vum Wulfilaich sou wéi se haut ass

De Wulfilaich, och alt Wulflaik oder Wulfilaicus, (fr) Walfroy, gebuer ëm 565 an der Lombardei a gestuerwen ëm 600 bei Margut, war e langobardesche Mënch, deen am 6. Joerhonnert an der Géigend vu Sedan gelieft huet.

Hie krut vum Tréierer Bëschof op engem Bierglateau zu Margut südëstlech vu Carignan (Ivoix) eng Plaz zougewisen, wou en als Klausener kéint liewen. Hien huet do eng Sail opgeriicht, wourop en als Sailenhellege gelieft a gepriedegt huet. Virdrun huet hien en Hellegtum vun der Diana dat do stoung, zerstéiert. Ausserdeem huet hien do um Plateau e Klouschter an eng Kierch opriichte gelooss, déi dem hellege Martin geweit war. Méi spéit huet de Bëschof him den Uerder ginn, vun der Sail erofzeklammen, an déi gouf zerstéiert.

Hie gouf no sengem Doud an der Mäerteskierch begruewen.

Zu Carignan gouf him 1869 e Monument opgestallt: Eng Sail mat enger Statu vun him uewendrop.

Den Adam Reiners, Paschtouer zu Uewerwampech, huet e "patriotisches Theaterstück für Jünglingsvereine (ohne Frauenrollen" mam Titel Der Luxemburger Säulenheilige Wulfilaich (584), ein grosser Martinusverehrer geschriwwen. Et gouf net publizéiert; d'Typoskript gëtt an der Bibliothéik vum Seminaire versuergt.

Literatur

• Romain Hilgert: "Ein Luxemburger Säulenheiliger." In d'Lëtzebuerger Land Nr.33, 15. August 2014, S.11.

Um Spaweck

• "Der hl. Abba Wulfilaich der Säulensteher." op orthodoxe-kirche.de.
• Websäit iwwer d'Klaus sou wéi se haut ass
• De Wulfilaich am ökumeenesche Lexikon vun den Hellegen (de)